தேனி மாவட்டம் ஆண்டிபட்டி அருகே உள்ள சித்தார்பட்டியை சேர்ந்த பிரதாப்(23), கட்டிட தொழிலாளியாக பணியாற்றி வந்துள்ளார். அதே ஊரை சேர்ந்த ரெங்கலட்சுமி என்ற பெண்ணுடன் காதலில் இருந்த பிரதாப், சில நாட்களுக்கு முன்பு போடி தீர்த்த தொட்டியில் இருவரும் குடும்ப அனுமதி இன்றி காதல் திருமணம் செய்துள்ளனர்.

இதுகுறித்து, ரெங்கலட்சுமியின் தாயார், போடி அனைத்து மகளிர் காவல் நிலையத்தில் புகார் அளித்துள்ளார். அதன் பின்னர் போலீசார் விசாரணை மேற்கொண்டனர். ஆனால், அதற்குள் ரெங்கலட்சுமி, தனது தாயாருடன் அவரது வீட்டிற்கு சென்றுவிட்டதாகவும், கணவரை விட்டுப் பிரிந்துவிட்டதாகவும் தகவல்கள் வெளியாகியுள்ளன.

இதனால் மன உளைச்சலில் இருந்த பிரதாப், யாரும் இல்லாத நேரத்தில் வீட்டில் தூக்குப்போட்டு தற்கொலை செய்து கொண்டுள்ளார். மகனின் மரணத்தை பார்த்ததும் அவரது தாயார் பழனித்தாய் கண்ணீரில் ஆழ்ந்தார். தகவலறிந்த போலீசார் உடனடியாக சம்பவ இடத்திற்கு சென்று, பிரதாபின் உடலை மீட்டு பிரேத பரிசோதனைக்காக அனுப்பி வைத்தனர்.

இது தொடர்பாக போலீசார் மேலதிக விசாரணை மேற்கொண்டு வருகின்றனர். திருமணமான சில நாட்களிலேயே மனைவி விலகி சென்ற துயரத்தில் காதலனின் உயிரிழப்பு உள்ளூர் மக்கள் மத்தியில் ஆழ்ந்த சோகத்தை ஏற்படுத்தியுள்ளது.