நடிகை குஷ்புவின் மகள் அவந்திகா மற்றும் ஷ்ரவன் சீனிவாசன் திருமணம் கோவாவில் மிக எளிமையாகவும் அதேசமயம் விமரிசையாகவும் நடந்து முடிந்துள்ளது. இதற்காகக் கோவா சென்ற நடிகை த்ரிஷா அங்கு நான்கு நாட்கள் தங்கி இருந்து விழாவைச் சிறப்பித்துள்ளார். த்ரிஷாவை மிஸ் சென்னை அழகிப் பட்டம் வென்ற காலத்திலிருந்து தனக்கு நன்றாகத் தெரியும் என்று நெகிழ்ச்சியுடன் தெரிவித்துள்ள குஷ்பு, அவர் தமக்கு மட்டுமல்லாமல் தன் பிள்ளைகளுக்கும் மிகவும் நெருக்கமான ஸ்வீட்டான நபர் எனப் புகழ்ந்துள்ளார்.

மேலும், திருமணத்திற்குத் தாங்கள் அழைப்பதற்கு முன்பே, குஷ்புவின் மகளே நேரடியாகத் த்ரிஷாவைத் தொடர்புகொண்டு இந்தத் விசேஷத்திற்குத் தேதி ஒதுக்கி வைக்குமாறு அன்போடு அழைப்பு விடுத்த சுவாரஸ்யமான தகவலையும் அவர் பகிர்ந்துள்ளார்.

மகள் அவந்திகாவின் விருப்பத்திற்கேற்ப, பிரம்மாண்டமான வரவேற்பு நிகழ்ச்சிகள் ஏதுமின்றி வெறும் 75 நெருங்கிய உறவினர்கள் மற்றும் நண்பர்கள் முன்னிலையில் மட்டுமே இந்தத் திருமணம் நடத்தப்பட்டுள்ளது. இதற்கிடையில், முதல்வர் விஜய்யின் இல்லத்திற்கு நேரில் சென்று குடும்பத்துடன் திருமணப் பத்திரிகையை வழங்கியதாகவும், புதிய முதல்வராகப் பொறுப்பேற்றுள்ளதால் சட்டப்பேரவை கூட்டத்தொடர் நேரத்தில் கோவாவுக்கு வருவது சிரமம் என்பதை விஜய் முன்கூட்டியே தன்னிடம் சுட்டிக்காட்டியதாகவும் குஷ்பு வெளிப்படையாகத் தெரிவித்துள்ளார்.

இதனிடையே, தஞ்சையில் எதிர்க்கட்சித் தலைவர் உதயநிதி ஸ்டாலின் த்ரிஷாவை அவதூறாகப் பேசியதாக எழுந்த சர்ச்சைக்குக் கண்டனம் தெரிவித்துள்ள குஷ்பு, த்ரிஷாவிடம் உதயநிதி பகிரங்கமாக மன்னிப்பு கேட்க வேண்டும் எனத் தனது சமூக வலைதளப் பக்கத்தில் ஆவேசமாக முழங்கியுள்ளதுடன், த்ரிஷா மீதான தனது பாசத்தை எப்போது வெளிப்படுத்தவும் தயங்கியதில்லை என்றும் அதிரடியாகக் கூறியுள்ளார்.