உத்தரப் பிரதேச மாநிலம் குஷிநகரில், திருமணமான இரண்டு மாதங்களே ஆன நிலையில், கூடுதல் வரதட்சணை கேட்டுத் துன்புறுத்தியதால் இளம்பெண் ஒருவர் தூக்கிட்டுத் தற்கொலை செய்துகொண்டார். இது தொடர்பாகக் கணவர் மற்றும் அவரது குடும்பத்தினர் மீது போலீஸார் வழக்குப் பதிவு செய்துள்ளனர்.

அதாவது  நேஹா (20) என்ற இளம்பெண்ணுக்கும்,  விவேக் (24) என்பவருக்கும் கடந்த நவம்பர் மாதம் 22-ஆம் தேதி திருமணம் நடைபெற்றது. திருமணத்திற்குப் பிறகு நேஹா தனது கணவர் வீட்டில் வசித்து வந்தார்.

திருமணமான சில நாட்களிலேயே, நேஹாவின் கணவர் விவேக் மற்றும் அவரது குடும்பத்தினர் கூடுதல் வரதட்சணை கேட்டு அவரைத் துன்புறுத்தத் தொடங்கியதாகக் கூறப்படுகிறது. இதனால் மிகுந்த மன உளைச்சலுக்கு ஆளான நேஹா, நேற்று மாலை தனது அறையில் துப்பட்டாவால் தூக்கிட்டுத் தற்கொலை செய்துகொண்டார்.

தகவலறிந்து சம்பவ இடத்திற்கு விரைந்த போலீஸார், நேஹாவின் உடலை மீட்டுப் பிரேதப் பரிசோதனைக்கு அனுப்பி வைத்தனர். இது குறித்து நேஹாவின் தந்தை அளித்த புகாரின் அடிப்படையில், அவரது கணவர் விவேக், மாமியார் மீனா உட்படக் குடும்பத்தைச் சேர்ந்த 6 பேர் மீது போலீஸார் வழக்குப் பதிவு செய்துள்ளனர். மேலும் திருமணமான 8 வாரங்களிலேயே (சுமார் 2 மாதங்கள்) வரதட்சணைக் கொடுமையால் புதுப்பெண் உயிரிழந்த சம்பவம் அந்தப் பகுதியில் பெரும் சோகத்தையும், பரபரப்பையும் ஏற்படுத்தியுள்ளது.