கரூர் மாவட்டம், தாந்தோன்றிமலை ஊராட்சிக்கு உட்பட்ட சின்னாண்டாங்கோவில் அரசு தொடக்கப் பள்ளியில் தலைமை ஆசிரியையாகப் பணிபுரியும் புவனா என்பவருக்கும், அதே பள்ளியில் இடைநிலை ஆசிரியையாகப் பணியாற்றும் கலைமதி என்பவருக்கும் இடையே நிலவிவந்த மோதல் முற்றி கைகலப்பாக மாறியுள்ளது.

ஆசிரியை கலைமதி முறையாகப் பள்ளிக்கு வராதது குறித்தும், தனது பணிகளைச் சரியாகக் கவனிக்காதது குறித்தும் தலைமை ஆசிரியை புவனா வட்டாரக் கல்வி அலுவலரிடம் புகார் அளித்திருந்தார்.

இந்தப் புகாரின் அடிப்படையில் கல்வித்துறை அதிகாரிகள் மேற்கொண்ட விசாரணையால் ஆத்திரமடைந்த கலைமதி, வகுப்பறையில் மாணவர்கள் முன்னிலையிலேயே தலைமை ஆசிரியை புவனாவைத் தாக்கியுள்ளார்.

இந்தத் திடுக்கிடும் மோதல் சம்பவம் தொடர்பான வீடியோ பதிவு தற்போது சக ஆசிரியை ஒருவரால் கைப்பற்றப்பட்டு சமூக வலைதளங்களில் வெளியாகி பெரும் அதிர்ச்சியை ஏற்படுத்தியுள்ளது.

அரசுப் பள்ளி வளாகத்திற்குள்ளேயே ஆசிரியர்கள் ஒருவருக்கொருவர் மோதிக்கொள்ளும் இத்தகைய சம்பவங்கள் கல்வித்துறையின் மீதான நம்பகத்தன்மையை கேள்விக்குள்ளாக்கியுள்ளன.

மாணவர்களின் கல்விப் பயிலும் சூழலில் இது போன்ற வன்முறைகள் அரங்கேறுவது பொதுமக்களிடையே கடும் கோபத்தை ஏற்படுத்தியுள்ளது.

“>

 

இதற்கிடையே, மாநிலத்தில் நிலவும் தொடர்ச்சியான நிர்வாகச் சீர்கேடுகளுக்கு தற்போதைய அரசுதான் பொறுப்பேற்க வேண்டும் என்றும், கல்வித்துறை உள்ளிட்ட பல்வேறு துறைகளில் முறையான நிர்வாகக் கட்டுப்பாடு இல்லாததே இதுபோன்ற விரும்பத்தகாத நிகழ்வுகள் தொடரக் காரணம் என்றும் அரசியல் விமர்சகர்கள் மற்றும் நெட்டிசன்கள் தங்களது சமூக வலைதளப் பக்கங்களில் தங்களது கண்டனங்களைப் பதிவு செய்து வருகின்றனர்.