ஐபிஎல் 2023 இல் 6 போட்டிகளில் வெறும் 39 ரன்கள் எடுத்து சொதப்பி வருகிறார் லக்னோ வீரர் தீபக் ஹூடா.

தீபக் ஹூடா கடந்த ஒரு வருடமாக இந்திய அணியின் டி20யில் முக்கிய பேட்ஸ்மேனாக இருந்து வருகிறார். ஐபிஎல் 2022 இல் லக்னோ சூப்பர் ஜெயண்ட்ஸ் அணிக்காக 451 ரன்கள் எடுத்தார். ஷ்ரேயாஸ் ஐயர் உள்ளிட்ட வீரர்கள் காயத்தால் வெளியேறியதன் மூலம் ஹூடா 2022 டி20 உலகக் கோப்பையில் இடம் பெற்றார். அதற்கு முன் ஆசிய கோப்பையிலும் அணியில் இடம்பிடித்திருந்தார். சர்வதேச டி20யில் தனது 3வது இன்னிங்சில் ஹூடா 104 ரன்கள் எடுத்தார்.

கடந்த ஆண்டு ஐபிஎல் போட்டிக்குப் பிறகு, அயர்லாந்துக்கு எதிரான அந்தப் போட்டியில், 57 பந்துகளில் 9 பவுண்டரிகள், 6 சிக்சர்கள் உட்பட 104 ரன்கள் விளாசினார். அயர்லாந்தைத் தொடர்ந்து இங்கிலாந்துக்கு சுற்றுப்பயணம் மேற்கொண்டுள்ள இந்திய அணி டி20 தொடரில் விளையாடியது. முதல் போட்டியில்,3வது இடத்தில் விளையாடிய அவர் 17 பந்துகளில் 33 ரன்கள் எடுத்தார்.

ஆனால் அடுத்த போட்டியில் விராட் கோலி திரும்பிய பிறகு அவர் நீக்கப்பட்டார். அப்போது விராட் கோலி சரியான பார்மில் இல்லாததால், இந்திய அணி நிர்வாகம் மீது நிறைய கேள்விகள் எழுப்பப்பட்டன. கோலிக்கு பதிலா தீபக் ஹூடாவை அணியில் சேர்க்க வேண்டும் என்றெல்லாம் கோரிக்கை எழுந்தது.. தீபக் அணியில் நீடித்தார், அதன் பிறகு அவருக்கு தொடர்ச்சியான வாய்ப்புகள் கிடைத்தன. ஆனால் ஆசிய கோப்பை மற்றும் டி20 உலகக் கோப்பையில் தீபக்கால் பெரிதாக எதுவும் செய்ய முடியவில்லை. இப்போது ஐபிஎல் 2023 இல், பார்ம் மிக மோசமாக உள்ளது.

6 இன்னிங்சில் 39 ரன்கள் மட்டுமே :

ஐபிஎல் 2023ல், தீபக் ஹூடா 6 இன்னிங்சில் 39 ரன்கள் மட்டுமே எடுத்துள்ளார். ராஜஸ்தான் ராயல்ஸ் அணிக்கு எதிரான லக்னோ சூப்பர் ஜெயன்ட் அணிக்கு எதிரான ஆட்டத்தில் 2 ரன்கள் மட்டுமே எடுத்து அவுட் ஆனார். அவரது விக்கெட்டை ரவிச்சந்திரன் அஸ்வின் கைப்பற்றினார். சிக்ஸர் அடிக்க முயன்றபோது பவுண்டரி லைனில் கேட்ச் ஆனார்.

முன்னதாக பஞ்சாப் அணிக்கு எதிராக 2 ரன்களும், ஆர்சிபிக்கு எதிராக 9 ரன்களும், ஹைதராபாத் அணிக்கு எதிராக 7 ரன்களும், சென்னைக்கு எதிராக 2 ரன்களும், டெல்லிக்கு எதிராக 17 ரன்களும் எடுத்தார். அதாவது 6 இன்னிங்சில் 5 முறை 10 ரன்களைக் கூட எட்ட முடியவில்லை.

இந்தியாவிற்கு ஆடும் போதும் இதே நிலை தான் :

இந்தியாவுக்காக டி20யிலும் தீபக் ஹூடாவால் கடந்த 10 இன்னிங்ஸ்களில் சிறப்பாக எதையும் செய்ய முடியவில்லை. கடந்த 10 இன்னிங்ஸில் அவரது ஸ்கோர்கள் 2*, 10, 4, 9, 41*, 9*, 0, 0, 3, மற்றும் 19 ஆகும். மும்பையில் இலங்கைக்கு எதிராக 41 ரன்கள் எடுத்ததைத் தவிர, அவரால் முடியவில்லை..  எனவே தொடர்ந்து லக்னோ அவருக்கு வாய்ப்பு வழங்குமா? அல்லது வரும் போட்டிகளில் அவரை தூக்கிவிட்டு வேறு யாரையாவது ஆட வைக்குமா என்ற கேள்வி எழுந்துள்ளது.