ஐபிஎல் 2026 தொடரில் ராஜஸ்தான் ராயல்ஸ் அணிக்கு எதிரான ஆட்டத்தில், சன்ரைசர்ஸ் ஹைதராபாத் (SRH) அணிக்காக அறிமுகமான விதர்பா வேகப்பந்து வீச்சாளர் பிரஃபுல் ஹிஞ்ச், தனது முதல் ஓவரிலேயே மூன்று விக்கெட்டுகளை வீழ்த்தி உலகத்தையே வியப்பில் ஆழ்த்தியுள்ளார்.

ஐபிஎல் வரலாற்றிலேயே அறிமுகப் போட்டியின் முதல் ஓவரிலேயே 3 விக்கெட்டுகளைக் கைப்பற்றிய முதல் பந்துவீச்சாளர் என்ற வரலாற்றுச் சாதனையை இந்த 24 வயது இளைஞர் படைத்துள்ளார். ஆரஞ்சு தொப்பி வைத்திருந்த வைபவ் சூர்யவன்ஷி, துருவ் ஜூரல் மற்றும் லுவான்ட்ரே பிரிட்டோரியஸ் ஆகிய மூவரையும் அடுத்தடுத்து ‘டக் அவுட்’ செய்து வெளியேற்றி, ராஜஸ்தான் அணியை நிலைகுலையச் செய்தார்.

வெறும் 30 லட்ச ரூபாய்க்கு ஏலத்தில் எடுக்கப்பட்ட ஹிஞ்ச், முதல் ஓவரிலேயே ராஜஸ்தான் அணியை 1/3 என்ற நிலைக்குத் தள்ளியது ஹைதராபாத் ரசிகர்களை உற்சாகத்தில் ஆழ்த்தியுள்ளது.

விதர்பா அணிக்காக உள்ளூர் போட்டிகளில் சிறப்பான ஆட்டத்தை வெளிப்படுத்திய ஹிஞ்ச், 10 முதல்தர போட்டிகளில் 27 விக்கெட்டுகளை வீழ்த்தி ஏற்கனவே தேர்வாளர்களின் கவனத்தை ஈர்த்தவர். தனது அறிமுகப் போட்டியிலேயே 4 விக்கெட்டுகளை (4/34) வீழ்த்தி ஆட்ட நாயகன் விருதையும் தட்டிச் சென்றார்.

இவருடன் மற்றொரு அறிமுக வீரரான சாகிப் ஹுசைனும் (4/24) அபாரமாகப் பந்துவீச, ஹைதராபாத் அணி 57 ரன்கள் வித்தியாசத்தில் அபார வெற்றி பெற்றது. 13 வயதில் கிரிக்கெட் விளையாடத் தொடங்கிய இந்த இளம் வீரர், தனது முதல் ஐபிஎல் ஓவரிலேயே முத்திரை பதித்திருப்பது, இந்திய கிரிக்கெட்டின் அடுத்த நம்பிக்கையாகப் பார்க்கப்படுகிறது.