சிறு வயதில் எலும்புகளை வலுவாக்கப் பால் குடிக்குமாறு அறிவுறுத்தப்பட்டாலும், வயதாகும்போது ஏற்படும் எலும்பு முறிவுகள் மற்றும் எலும்பு பலவீனத்தைப்  பற்றி நாம் பெரிதாகச் சிந்திப்பதில்லை. வயது முதிர்வில் நமது எலும்புகளின் வலிமை என்பது, குழந்தைப்பருவம் மற்றும் இளமைப் பருவத்தில் நாம் சேமித்து வைக்கும் எலும்பு அடர்த்தியைப் பொறுத்தே அமைகிறது. குறிப்பாக, பெண்களுக்கு மாதவிடாய் நிறுத்தத்திற்குப் பிறகும், ஆண்களுக்கு வயது முதிர்வினாலும் எலும்பு தேய்மானம் மற்றும் எலும்பு முறிவுக்கான வாய்ப்புகள் பெருமளவில் அதிகரிக்கின்றன.

எலும்புகளை ஆரோக்கியமாக வைத்திருக்கப் பால், தயிர், பாலாடைக்கட்டி போன்ற பால் பொருட்கள் மட்டுமே போதாது. பால் பொருட்களில் உள்ள கால்சியம் மற்றும் புரோட்டீன் சத்துக்கள் எலும்புகளைப் பாதுகாப்பதோடு, முதியவர்களுக்குக் கீழே விழுவதால் ஏற்படும் எலும்பு முறிவுகளையும் தடுக்க உதவுகின்றன. ஆனால், பால் பொருட்கள் மட்டுமன்றி வேறு பல உணவுகளும் எலும்பு ஆரோக்கியத்திற்குப் பெரிதும் துணைபுரிகின்றன.

சோயா உணவுகளான டோஃபு  மற்றும் டெம்பே  ஆகியவற்றில் அதிகளவு கால்சியம் நிறைந்துள்ளது. மேலும், சியா விதைகள், உலர் பழங்களான அத்திப்பழம் மற்றும் பேரீச்சம்பழம், மீன்  போன்ற உணவுகளும் எலும்புகளை வலுவாக்க உதவுகின்றன. மீனில் உள்ள வைட்டமின் D சத்து, உடலானது கால்சியத்தை எளிதாக உறிஞ்சுவதற்கு வழிவகுக்கிறது.

சரிவிகித உணவை உட்கொள்பவர்களுக்குத் தனியாகச் சத்து மாத்திரைகள் தேவையில்லை. இருப்பினும், உணவின் மூலம் போதிய கால்சியம் மற்றும் வைட்டமின் D பெற முடியாதவர்கள் மருத்துவரின் ஆலோசனையோடு மாத்திரைகளை எடுத்துக் கொள்ளலாம். எனவே, சரியான சத்துக்கள் நிறைந்த உணவுகளோடு, சுறுசுறுப்பான உடற்பயிற்சிகளையும் மேற்கொள்வதே வாழ்நாள் முழுவதும் எலும்புகளைப் பலமாக வைத்திருக்கச் சிறந்த வழியாகும்.