தென்னிந்திய சினிமாவின் உச்ச நட்சத்திரமாகவும், தற்போது தமிழக முதலமைச்சராகவும் இருக்கும் ‘தளபதி’ விஜய் மீது இந்தியா முழுவதும் உள்ள ரசிகர்கள் வைத்துள்ள பாசம் எத்தகையது என்பதை நிரூபிக்கும் வகையில் ஒரு நெகிழ்ச்சியான சம்பவம் ராஜஸ்தான் மாநிலத்தில் அரங்கேறியுள்ளது. முதல்வர் விஜய்யை நேரில் சந்தித்து வாழ்த்து பெறுவதற்காக, ராஜஸ்தானைச் சேர்ந்த தீவிர ரசிகர் ஒருவர் சுமார் 2400 கிலோமீட்டர் தூரத்திற்கு மாபெரும் பாதயாத்திரையைத் தொடங்கியுள்ளார்.

ராஜஸ்தான் மாநிலம் ராஜசமந்த் மாவட்டத்தின் கான்க்ரோலி பகுதியைச் சேர்ந்தவர் ஃபரித் ரங்ரேஸ். தளபதி விஜய்யின் தீவிர ரசிகரான இவர், விஜய்யை நேரில் சந்திக்க வேண்டும் என்பதை தனது வாழ்நாள் லட்சியமாகக் கொண்டுள்ளார். இதற்காக எவ்வித வாகனங்களையும் பயன்படுத்தாமல், ராஜஸ்தானில் இருந்து தமிழ்நாடு வரை சுமார் இரண்டாயிரத்து ஐந்நூறு கிலோமீட்டர் தூரத்தை முற்றிலும் கால்நடையாகவே கடக்க அவர் முடிவு செய்துள்ளார்.

இந்த நீண்ட நெடிய பயணத்தின் தொடக்கமாக, கான்க்ரோலியில் உள்ள புகழ்பெற்ற ஃபவாரா சவுக்கில் இருந்து ஃபரித் தனது பாதயாத்திரையைத் தொடங்கினார். அவர் கிளம்பும் போது அவரது நண்பர்கள், உறவினர்கள் மற்றும் அப்பகுதி பொதுமக்கள் என பெரும் கூட்டமே திரண்டு வந்து, அவருக்கு மாலை அணிவித்து, இனிப்புகள் வழங்கி தங்களது வாழ்த்துகளைத் தெரிவித்தனர். இந்த சவாலான மற்றும் நெகிழ்ச்சியான பயணத்தை வெற்றிகரமாக முடிக்க பலரும் அவருக்கு வாழ்த்து கூறி வழியனுப்பி வைத்தனர்.

தனது இந்த அசாத்திய பயணம் குறித்துப் பேசிய ஃபரித் ரங்ரேஸ், “நான் விஜய்யை ஒரு நடிகராக மட்டும் நேசிக்கவில்லை; தமிழக முதலமைச்சராக அவர் மக்கள் நலனுக்காகச் செய்து வரும் சிறப்பான பணிகளும், அவரது தனித்துவமான ஆளுமையும் என்னை மிகவும் கவர்ந்துள்ளது. அதனால்தான் அவரை நேரில் பார்க்க வேண்டும் என்ற வெறியுடன் இந்த பயணத்தைத் தொடங்கியுள்ளேன். தினமும் குறிப்பிட்ட தூரம் என கணக்கிட்டு, அடுத்த இரண்டு முதல் மூன்று மாதங்களுக்குள் தமிழ்நாட்டை வந்தடைவேன்” என்று நம்பிக்கையுடன் தெரிவித்துள்ளார்.