தமிழக அரசியலில் நீண்டகாலமாகப் பரபரப்பை ஏற்படுத்தி வந்த ஓ.பன்னீர்செல்வம், தற்போது அதிகாரப்பூர்வமாகத் திமுகவில் இணைந்துள்ளார். இந்நிலையில், அவரது காரில் நீண்டகாலமாக வைக்கப்பட்டிருந்த மறைந்த முன்னாள் முதல்வர் ஜெயலலிதாவின் புகைப்படம் அகற்றப்பட்டு, அதற்குப் பதிலாகத் தமிழக முதல்வர் மு.க.ஸ்டாலினின் புகைப்படம் வைக்கப்பட்டுள்ளது. “ஜெயலலிதாவின் ஆட்சியை மீண்டும் அமைப்போம்” என்று கூறி வந்தவர், இப்போது பதவிக்காக அவரைத் தூக்கி எறிந்துவிட்டாரா என்று சமூக வலைதளங்களில் கடும் விமர்சனங்கள் எழுந்துள்ளன.
இது குறித்துச் செய்தியாளர்கள் ஓ.பி.எஸ்-ஸிடம் கேள்வி எழுப்பியபோது, அவர் சற்றும் தயக்கமின்றித் தனது முடிவை நியாயப்படுத்தினார். “தற்போது நான் திமுகவில் இணைந்திருப்பதால், கட்சியின் தலைவர் ஸ்டாலினின் புகைப்படத்தை வைப்பதில் எந்தத் தவறும் இல்லை” என்று அவர் அதிரடியாகப் பதிலளித்துள்ளார். அவரது இந்தப் பதில் அதிமுக தொண்டர்கள் மத்தியில் பெரும் அதிர்ச்சியை ஏற்படுத்தியுள்ளதுடன், தமிழக அரசியல் களத்தில் விவாதப் பொருளாகவும் மாறியுள்ளது.
