சென்னை அண்ணா அறிவாலயத்தில் இன்று நடைபெற்ற திமுக மாவட்ட செயலாளர்கள் கூட்டத்திற்குப் பிறகு, அக்கட்சியின் தலைமை செய்தித் தொடர்பாளர் டி.கே.எஸ். இளங்கோவன் செய்தியாளர்களைச் சந்தித்தார். அப்போது, தமிழக வெற்றிக் கழகம் (தவெக) பாஜக தலைமையிலான NDA கூட்டணியில் இணையப் போவதாக வெளியாகும் தகவல்கள் குறித்து கேள்வி எழுப்பப்பட்டது. ​இதற்குத் தனது பாணியில் பதிலளித்த டி.கே.எஸ். இளங்கோவன், “பாஜகவுடன் விஜய் கூட்டணி வைத்தால் அது திமுகவுக்குத் தான் மிகப்பெரிய பலம் மற்றும் நல்லது” என்று அதிரடியாகத் தெரிவித்தார்.

மேலும், “வரலாற்றைப் பார்த்தால் பாஜகவுடன் கூட்டணி வைத்த எந்தவொரு கட்சியும் இதுவரை வெற்றி பெற்றதாகச் சரித்திரமே இல்லை; அவர்கள் வீழ்ச்சியைத் தான் சந்தித்துள்ளார்கள்” என விஜய்யின் அரசியல் நகர்வை விமர்சித்துப் பேசியுள்ளார். இவரின் இந்தப் பேச்சு தற்போது சமூக வலைதளங்களில் விவாதப் பொருளாக மாறியுள்ளது.