தமிழக அரசியலுக்கும் திரைத்துறைக்கும் இடையிலான பிணைப்பு அரை நூற்றாண்டைத் தாண்டியும் தொடர்கிறது. எம்.ஜி.ஆர்., ஜெயலலிதா வரிசையில் தற்போது நடிகர் விஜய்யும் தனது தமிழக வெற்றிக் கழகம் மூலம் தேர்தல் களத்தில் குதிக்கத் தயாராகி வருகிறார். இந்நிலையில், அவர் எந்தத் தொகுதியில் போட்டியிடுவார் என்பது குறித்த எதிர்பார்ப்பு அரசியல் வட்டாரத்தில் சூடுபிடித்துள்ளது.
திரைத்துறையிலிருந்து அரசியலுக்கு வந்த தலைவர்கள் தங்கள் முதல் தேர்தலில் சந்தித்த முடிவுகள் மாறுபட்டவை. கடந்த 1967-ல் பரங்கிமலையில் எம்.ஜி.ஆர்., 1989-ல் போடிநாயக்கனூரில் ஜெயலலிதா, 2006-ல் விருத்தாசலத்தில் விஜயகாந்த் ஆகியோர் தங்களது முதல் சட்டமன்றத் தேர்தலிலேயே வெற்றி பெற்றனர்.
அதே நேரத்தில் திருவையாறு தொகுதியில் போட்டியிட்ட நடிகர் திலகம் சிவாஜி கணேசன் மற்றும் கோவை தெற்கில் போட்டியிட்ட கமல்ஹாசன் ஆகியோர் தோல்வியைச் சந்தித்தனர்.
விஜய் தரப்பில் மதுரை வடக்கு, திருச்சி, கோவை உள்ளிட்ட பல தொகுதிகள் பரிசீலிக்கப்பட்ட நிலையில், தற்போது ஜோதிட ரீதியான ‘V’ (வி) என்ற எழுத்தில் தொடங்கும் தொகுதிகளுக்கு முன்னுரிமை அளிக்கப்படுவதாகக் கூறப்படுகிறது.
இதன்படி விக்கிரவாண்டி, விருகம்பாக்கம், வில்லிவாக்கம் ஆகிய தொகுதிகள் பட்டியலில் இருந்தன. ஆனால், தற்போது சென்னை வேளச்சேரி தொகுதி விஜய்யின் கவனத்தை ஈர்த்துள்ளதாகத் தெரிகிறது.
வேளச்சேரி தொகுதியை விஜய் தரப்பு பரிசீலிக்க முக்கியக் காரணங்களாக அரசியல் நோக்கர்கள் கூறுவது:
இங்கு ஐ.டி (IT) துறையில் பணியாற்றும் இளைஞர்கள் மற்றும் முதல்முறை வாக்காளர்கள் அதிகம். இது விஜய்யின் செல்வாக்கிற்குச் சாதகமாக அமையும் எனக் கருதப்படுகிறது.
கடந்த 2011-ல் உருவாக்கப்பட்ட இந்தத் தொகுதியில் தி.மு.க, அ.தி.மு.க ஆகிய இரு கட்சிகளும் இன்னும் வலுவாகக் கால் ஊன்றவில்லை. தற்போது இத்தொகுதி காங்கிரஸ் வசம் உள்ளது.
வரும் தேர்தலில் அ.தி.மு.க கூட்டணியில் இத்தொகுதி பா.ஜ.க-வுக்கு ஒதுக்கப்படலாம் என எதிர்பார்க்கப்படுகிறது. இது மும்முனைப் போட்டியில் விஜய்க்கு வெற்றி வாய்ப்பைப் பிரகாசமாக்கும் எனக் கணிக்கப்படுகிறது.
விஜய்யின் இல்லம் அமைந்துள்ள பனையூருக்கு அருகிலேயே இந்தத் தொகுதி இருப்பதால், தேர்தல் பணிகளை மேற்கொள்வது எளிதாக இருக்கும்.
இருப்பினும், தேர்தல் தேதி அறிவிக்கப்படும் வரை விஜய் போட்டியிடும் தொகுதி குறித்த அதிகாரப்பூர்வத் தகவல் வெளியாக வாய்ப்பில்லை. அதுவரை இந்த ‘சஸ்பென்ஸ்’ நீடிக்கும் என்பதில் சந்தேகமில்லை.
