ஆன்லைன் ஷாப்பிங் தளமான ‘டெமு’வில் (Temu) சமையல் பாத்திரங்களை ஆர்டர் செய்த பெண் ஒருவருக்கு, நிஜப் பாத்திரங்களுக்குப் பதிலாக அவற்றின் புகைப்படங்கள் அச்சிடப்பட்ட ஒரு பெரிய போஸ்டர் டெலிவரி செய்யப்பட்ட சம்பவம் இணையதளங்களில் சிரிப்பலையை ஏற்படுத்தியுள்ளது. அந்தப் பெண் மிகவும் ஆவலோடு பார்சலைப் பிரிக்கும்போது, உள்ளே பச்சை நிறப் பாத்திரங்கள், மூடிகள் மற்றும் ஆப்பிள் பழங்கள் வரையப்பட்ட ஒரு பெரிய காகிதச் சுருள் வெளியே வருகிறது. தான் பார்த்த விளம்பரத்தையும், கையில் இருக்கும் போஸ்டரையும் ஒப்பிட்டுப் பார்த்துவிட்டு அந்தப் பெண் கத்திய கத்தலில், அங்கிருந்த அவரது குடும்பத்தினரே அதிர்ச்சியில் உறைந்து போயுள்ளனர்.

​இந்த வீடியோ ‘X’ தளம் மற்றும் இன்ஸ்டாகிராமில் காட்டுத்தீயாகப் பரவி வருகிறது. இதைப் பார்த்த நெட்டிசன்கள், “அக்காவுக்கு 2D வெர்ஷன் பாத்திரம் கிடைச்சிருக்கு!” என்றும், “இனிமேலாவது கீழ இருக்குற ‘Fine Print’-ஐ படிங்க சகோதரிகளே!” என்றும் சகட்டுமேனிக்குக் கிண்டல் செய்து வருகின்றனர். ஆன்லைனில் மலிவாகக் கிடைக்கிறது என்பதற்காகப் பொருட்களை வாங்கும்போது எவ்வளவு விழிப்புணர்வுடன் இருக்க வேண்டும் என்பதற்கு இந்தச் சம்பவம் ஒரு மிகச்சிறந்த உதாரணமாக மாறிவிட்டது. சமைக்க நினைத்த பாத்திரம், கடைசியில் சுவரில் ஒட்டும் ‘வால் ஆர்ட்’ ஆக மாறியதுதான் இந்த ஆண்டின் ஆகச்சிறந்த ‘ஆன்லைன் ஷாப்பிங்’ காமெடியாகப் பார்க்கப்படுகிறது.