மத்திய பிரதேச மாநிலத்தில் நள்ளிரவு நேரத்தில் குடும்பத்தோடு திரைப்படம் பார்த்துவிட்டுத் திரும்பிய இளைஞர் ஒருவரைப் போலீசார் அநாகரிகமாக நடத்தியுள்ள சம்பவம் பெரும் அதிர்ச்சியை ஏற்படுத்தியுள்ளது. நள்ளிரவு சுமார் 1 மணி அளவில், தனது மனைவி மற்றும் குழந்தைகளுடன் மோட்டார் சைக்கிளில் வீட்டிற்குத் திரும்பிக் கொண்டிருந்த அந்த இளைஞரைப் போலீசார் வாகனச் சோதனைக் காக நடுரோட்டில் மறித்துள்ளனர். அப்போது, காவல்துறையினர் திடீரென அந்த இளைஞரின் இருசக்கர வாகனத்தின் சாவியைப் பிடுங்கியதாகக் கூறப்படுகிறது.

​தான் குடும்பத்துடன் திரைப்படத்திற்குச் சென்றுவிட்டுத் தான் வருகிறேன் என்பதற்கான அத்தாட்சியாகத் திரைப்பட நுழைவுச் சீட்டைக் (Movie Ticket) காட்டிய போதிலும், போலீசார் அதை ஏற்க மறுத்துள்ளனர். மேலும், அந்த இளைஞரின் மனைவி மற்றும் பச்சிளம் குழந்தைகளுக்கு முன்னிலையிலேயே அவரிடம் மிகவும் அநாகரிகமாக நடந்துகொண்ட போலீசார், நடுரோட்டில் வைத்து அந்த இளைஞரின் கன்னத்தில் அறைந்து துஷ்பிரயோகம் செய்துள்ளனர். இந்த அராஜகச் சம்பவம் குறித்த தகவல் தற்போது சமூக வலைதளங்களில் வெளியாகி, பொதுமக்களிடையே பெரும் கொந்தளிப்பையும், காவல்துறையினர் மீதான கண்டனங்களையும் எழுப்பியுள்ளது.