தமிழக பாஜக தலைவர் அண்ணாமலை, வரும் தேர்தலுக்குள் ஒரு புதிய கட்சியைத் தொடங்கத் திட்டமிட்டுள்ளதாக திமுக கொள்கை பரப்பு இணைச் செயலாளர் சபாபதி மோகன் ஒரு பரபரப்பான தகவலைக் கிளப்பியுள்ளார். அண்ணாமலை தன்னைத் தானே பிரபலப்படுத்திக் கொள்வதற்காகவே அடிக்கடி தொலைக்காட்சிகளில் பேட்டி கொடுத்து வருவதாக விமர்சித்த அவர், பாஜகவில் அண்ணாமலையின் நாட்கள் எண்ணப்பட்டு வருவதாகவும், விரைவில் அவர் கட்சியிலிருந்து ஒதுக்கப்படலாம் அல்லது விலகலாம் என்றும் கூறியுள்ளார்.
ஏற்கனவே அண்ணாமலை தனி கட்சி தொடங்கப்போவதாக அரசியல் வட்டாரத்தில் பேச்சுகள் எழுந்தபோது, அண்ணாமலை தரப்பில் அது முற்றிலும் மறுக்கப்பட்டது. “அப்படி ஒரு திட்டமே இல்லை” என்று அவர் திட்டவட்டமாகத் தெரிவித்திருந்த போதிலும், தற்போது திமுக தரப்பு மீண்டும் இந்தப் புகாரைக் கையில் எடுத்துள்ளது. இது அண்ணாமலைக்கும் பாஜக தலைமைக்கும் இடையே விரிசலை உண்டாக்கும் முயற்சியாகப் பார்க்கப்பட்டாலும், தேர்தல் நேரத்தில் இது போன்ற கருத்துகள் அரசியல் களத்தில் பெரும் சலசலப்பை ஏற்படுத்தியுள்ளது.
