நாம் கஷ்டப்பட்டுச் சம்பாதித்த பணம் நம்மிடமே தங்குவதற்கும், கொடுத்த பணம் திரும்பக் கிடைப்பதற்கும் மகாலட்சுமியின் அருளோடு குரு மற்றும் சுக்கிர பகவானின் அருளும் அவசியம் தேவை. பெரும் செல்வத்திற்கு குரு பகவானும், அன்றாட பணவரவு மற்றும் ஆடம்பரமான வாழ்க்கைக்குச் சுக்கிர பகவானும் அதிபதியாகத் திகழ்கின்றனர். இந்த இரண்டு கிரகங்களின் அருளைப் பெறுவதற்கான எளிய தானத்தைப் பற்றி இங்கே பார்ப்போம்.

வியாழக்கிழமை குரு பகவானுக்குரிய நாளாகும். அன்று மஞ்சள் நிற ஆடை அணிவது, மஞ்சள் மலர்களைச் சாற்றுவது மற்றும் கொண்டைக்கடலை மாலை அணிவித்து வழிபாடு செய்வது சிறந்தது. மேலும், கருப்புக் கொண்டைக்கடலையை வேகவைத்து சுண்டலாகச் செய்து, வியாழக்கிழமையன்று கோவிலுக்கு வரும் பக்தர்களுக்குத் தானமாக வழங்குவதன் மூலம் குருவின் அருளைப் பெற முடியும்.

அதேபோல், வெள்ளிக்கிழமையன்று சுக்கிர பகவானுக்குரிய வெள்ளை மொச்சையைச் சுண்டலாகத் தயார் செய்து கோவிலில் தானமாகத் தர வேண்டும். இப்படி வியாழன் மற்றும் வெள்ளிக்கிழமைகளில் தொடர்ந்து சுண்டல் தானம் செய்து வருவதால், குரு மற்றும் சுக்கிரனின் அருள் நமக்கு முழுமையாகக் கிடைக்கும்.

இந்தத் தானத்தை வாரந்தோறும் அல்லது மாதத்திற்கு ஒருமுறையாவது தொடர்ந்து செய்து வந்தால், தடைப்பட்ட பணவரவு சீராகும். நினைத்துப் பார்க்க முடியாத அளவுக்குச் செல்வ வளம் பெருகி, குரு-சுக்கிர யோகத்தால் மகிழ்ச்சியான மற்றும் செல்வச் செழிப்பான வாழ்க்கை அமையும்.