தமிழகத்தில் நிலவும் சட்டம் ஒழுங்கு சீர்குலைவு குறித்து எதிர்க்கட்சித் தலைவர் எடப்பாடி பழனிசாமி அவர்கள் திமுக அரசை கடுமையாகச் சாடியுள்ளார். “நீங்கள் ஆண்டது போதும்; மக்கள் மாண்டது போதும்” என்று ஆவேசமாகத் தெரிவித்துள்ள அவர், தமிழகத்தில் எங்கும் கொலை, எப்போதும் கொலை என்ற அச்சமான சூழல் நிலவுவதாகக் குற்றம் சாட்டியுள்ளார். தொடர்ச்சியாக அரங்கேறி வரும் கொலைச் செய்திகளும், அதிகரித்து வரும் பாலியல் குற்றங்களும் மக்களிடையே மிகப்பெரிய பயத்தை உருவாக்கியுள்ளதாக அவர் தனது அறிக்கையில் சுட்டிக்காட்டியுள்ளார்.
திமுக ஆட்சியின் கடைசி நாட்களை எண்ணிக்கொண்டிருக்கும் இந்த நேரத்தில், அரசு இனியாவது விழித்துக்கொண்டு சட்டம் ஒழுங்கைப் பாதுகாக்க உரிய நடவடிக்கை எடுக்க வேண்டும் என்று அவர் வலியுறுத்தியுள்ளார். மக்களைப் பாதுகாப்பதில் இந்த அரசு தோல்வியடைந்துவிட்டதாகக் குறிப்பிட்ட எடப்பாடி பழனிசாமி, பொதுமக்களின் உயிருக்கும் உடைமைக்கும் பாதுகாப்பற்ற ஒரு நிலை உருவாகியிருப்பதாக வேதனையுடன் தெரிவித்துள்ளார்.
