இந்தியாவின் முதல் உள்நாட்டுத் தொழில்நுட்பத்தில் இயங்கும் ஹைட்ரஜன் ரயில் மீது போராட்டக்காரர்கள் கல்வீசித் தாக்குதல் நடத்தியதாக சமூக வலைதளங்களில் பகிரப்பட்டு வரும் வீடியோ ஒன்று பெரும் பரபரப்பையும் கொந்தளிப்பையும் ஏற்படுத்தியுள்ளது. ஒரு ரயில் நிலையத்திற்குள் ரயில் நுழையும் வேளையில், பிளாட்பாரத்தில் நின்றிருந்த சிலர் அதன்மீது சரமாரியாகக் கற்களை வீசும் காட்சி அந்த வீடியோவில் பதிவாகியுள்ளது. ‘சிஜேபி’ (CJP) அமைப்பின் ஆதரவாளர்கள்தான் இந்தத் தாக்குதலில் ஈடுபட்டதாகக் கூறிப் பலரும் இந்த வீடியோவை சமூக வலைதளங்களில் வைரலாக்க, இணையத்தில் காரசாரமான விவாதங்கள் சூடுபிடித்தன.

எனினும், இந்தத் தாக்குதல் சம்பவம் குறித்தும் பரப்பப்படும் தகவல்கள் குறித்தும் தீவிர ஆய்வு செய்த வடக்கு ரயில்வே  பரவி வரும் செய்தி முற்றிலும் வதந்தி எனத் தீர்க்கமாக மறுத்துள்ளது. தாக்குதலுக்குள்ளான ரயில் ஹைட்ரஜன் ரயில் அல்ல என்றும், அது ‘WAG-12’ என்ற எலக்ட்ரிக் என்ஜின் மூலம் இயக்கப்படும் ரயில் என்றும் தெளிவுபடுத்தியுள்ளது. மேலும், இந்த வீடியோ எங்கு, எப்போது எடுக்கப்பட்டது என்ற விவரங்கள் தெளிவாகத் தெரியவில்லை என்ற போதிலும், இது ஒரு பழைய வீடியோவாக இருக்கக்கூடும் என்றும் ரயில்வே நிர்வாகம் அதிகாரப்பூர்வமாகத் தெரிவித்துள்ளது.

தற்போது இந்தியாவின் ஹைட்ரஜன் ரயில் சேவை எவ்வித தடங்கலுமின்றி, அதற்குரிய நிர்ணயிக்கப்பட்ட நேர அட்டவணையின்படி வழக்கம்போல் சீராக இயங்கி வருவதாக ரயில்வே தரப்பில் உறுதி செய்யப்பட்டுள்ளது. மேலும் வீடியோவில் காணப்படும் என்ஜின், பீகார் மாநிலம் மாதேபுராவில் இந்திய ரயில்வே மற்றும் ஆல்ஸ்டோம்  நிறுவனத்தின் கூட்டுத் தயாரிப்பில் உருவாக்கப்பட்ட 12,000 குதிரைத்திறன்  கொண்ட ‘WAG-12’ ரக சக்திவாய்ந்த மின்சார சரக்கு என்ஜின் ஆகும். வழக்கமான ஹைட்ரஜன் ரயிலின் தோற்றத்திற்கும் இதற்கும் பெரும் வித்தியாசம் உள்ளது என்பது குறிப்பிடத்தக்கது.

சமீபகாலமாக நாட்டின் முக்கிய மேம்பாட்டுத் திட்டங்கள் மற்றும் புதுமையான கண்டுபிடிப்புகள் குறித்து சமூக வலைதளங்களில் போலி வீடியோக்களையும், தவறான தகவல்களையும் பரப்புவது அதிகரித்து வருகிறது. எனவே, உண்மைத்தன்மையை ஆராயாமல் இதுபோன்ற உணர்ச்சிப்பூர்வமான வீடியோக்களையும், அடிப்படை ஆதாரமற்ற வதந்திகளையும் பொதுமக்கள் சமூக வலைதளங்களில் பகிர்வதைத் தவிர்க்க வேண்டும் என்றும், அதிகாரப்பூர்வ தகவல்களை மட்டுமே நம்ப வேண்டும் என்றும் ரயில்வே துறை கேட்டுக்கொண்டுள்ளது.