இந்திய டி20 அணியில் இன்று அயர்லாந்துக்கு எதிராகக் களம் இறங்க வாய்ப்புள்ள 15 வயது இளம் வீரர் வைபவ் சூர்யவன்ஷிக்கு, இந்திய அணியின் முன்னாள் சுழற்பந்து வீச்சாளர் ரவிச்சந்திரன் அஸ்வின் ஒரு முக்கிய ஆலோசனையை வழங்கியுள்ளார். வைபவ் சூர்யவன்ஷி தனது 12 வயதிலேயே ரஞ்சி டிராபியிலும், 14 வயதில் ஐபிஎல் தொடரில் சதமடித்தும் அசத்தியவர்; அத்துடன் 2026 ஐபிஎல் சீசனில் அதிக ரன்கள் குவித்து ஆரஞ்சு கேப்பையும் வென்று அசுர சாதனை படைத்துள்ளார்.

இந்த அபாரமான ஆட்டத்தின் காரணமாகவே அவர் இந்திய அணியின் அயர்லாந்து மற்றும் இங்கிலாந்து சுற்றுப்பயணங்களுக்குத் தேர்ந்தெடுக்கப்பட்டுள்ளார். இன்று அயர்லாந்துக்கு எதிரான முதலாவது டி20 போட்டியில் அவர் களம் இறங்கினால், இந்திய ஆண்கள் கிரிக்கெட் வரலாற்றிலேயே மிக இள வயதில் சர்வதேச போட்டியில் அறிமுகமான வீரர் என்ற சச்சின் டெண்டுல்கரின் சாதனையை முறியடிப்பார்.

வைபவ் மீது தற்போது எழுந்துள்ள அதீத எதிர்பார்ப்புகள் குறித்துப் பேசியுள்ள ரவிச்சந்திரன் அஸ்வின், “அவன் இன்னும் 15 வயது சிறுவன் தான், அதனால் எந்தவித அழுத்தமும் இன்றி தனது கிராமத்துத் தெருக்களில் விளையாடுவதைப் போல மைதானத்திலும் விளையாட்டை ரசித்து ஆட வேண்டும்; நம்மை மகிழ்விக்க வேண்டும்” என்று தெரிவித்துள்ளார். மேலும், அனுபவம் வாய்ந்த பந்துவீச்சாளர்களுக்கு எதிராக வைபவ் சாமர்த்தியமாகச் செய்யும் பேட்டிங் மாற்றங்கள் அவன் ஒரு ‘ஸ்பெஷல் பிளேயர்’ என்பதை நிரூபிப்பதாக அஸ்வின் வெகுவாகப் பாராட்டியுள்ளார்.

இதற்கிடையே, இந்திய அணியின் பேட்டிங் பயிற்சியாளர் சிதான்ஷு கோடக், வைபவிற்கான சரியான வாய்ப்பு நிச்சயம் வழங்கப்படும் என்று கூறியுள்ளார். இன்றைய போட்டியில் அபிஷேக் சர்மாவுக்குப் பதிலாக வைபவ் சூர்யவன்ஷி, சஞ்சு சாம்சனுடன் இணைந்து தொடக்க வீரராகக் களம் இறங்க வாய்ப்புள்ளதால், பிளேயிங்-11  அணியைத் தேர்ந்தெடுப்பதில் கேப்டன் ஸ்ரேயாஸ் ஐயர் மற்றும் தலைமை பயிற்சியாளர் கௌதம் கம்பீருக்குப் பெரிய சவால் காத்துள்ளது.