உத்தரப்பிரதேச மாநிலம் மீரட் மாவட்டம் ஜிதவ் கேட் பகுதியில் வசித்து வந்தவர் ரவிசங்கர் (வயது 28). இவர் கடந்த ஜனவரி மாதம் ஸ்வப்னா (வயது 25) என்பவரை திருமணம் செய்து கொண்டார். திருமணமான சில மாதங்களுக்கே கணவன், மனைவிக்குள் கருத்து வேறுபாடுகள் மற்றும் மனக்கசப்புகள் ஏற்பட்டு, இதனால் ஸ்வப்னா கடந்த 5 மாதங்களாக தனது திருமணமான தங்கையின் வீட்டில் தங்கியிருந்து வந்துள்ளார்.

இதற்கிடையில், ஸ்வப்னா 7 மாத கர்ப்பிணியாக இருந்த நிலையில், நேற்று ரவிசங்கர் தன்னுடைய மனைவியின் தங்கையின் வீட்டிற்கு சென்று, மனைவியை சமாதானம் செய்வது போல பேசினார். பின்னர், தனியாக பேசவேண்டும் என கூறி ஸ்வப்னாவை அந்த வீட்டில் உள்ள ஒரு தனி அறைக்குள் அழைத்துச் சென்றார். அங்கு, முன்கூட்டியே வைத்திருந்த கத்தியால் ஸ்வப்னாவை திடீரென சரமாரியாக குத்தினார்.

இந்த தாக்குதலில் ஸ்வப்னா ரத்த வெள்ளத்தில் சாய்ந்து, சம்பவ இடத்திலேயே உயிரிழந்தார். 7 மாத கர்ப்பமுள்ள நிலையில் பெண்ணை கொலை செய்த கொடூரமான  செயலால், அப்பகுதி மக்கள் அதிர்ச்சியடைந்தனர். தன் மனைவியை கொலை செய்த பின்னர், ரவிசங்கர் நேரடியாக காவல்துறையை அழைத்து தகவல் அளித்தார். இதையடுத்து போலீசார் விரைந்து வந்து அவரை கைது செய்தனர்.

காவல்துறையினர் உடனடியாக ஸ்வப்னாவின் உடலை கைப்பற்றி பிரேத பரிசோதனைக்காக அனுப்பிவைத்தனர். இச்சம்பவம் தொடர்பாக வழக்குப் பதிவு செய்த போலீசார், மேலும் விசாரணை நடத்தி வருகின்றனர். இச்சம்பவம் மீரட் மாவட்டத்தில் பெரும் அதிர்வலைகளை ஏற்படுத்தியுள்ளது. மனக்கசப்பால், கர்ப்பிணியான மனைவியை கொடூரமாக கொன்ற கணவனின் செயல்முறை, சமூகத்தில் பெரும் வன்மையை கிளப்பியுள்ளது.