முதலமைச்சர் மு.க.ஸ்டாலின், கிருஷ்ணகிரியில் ரூ.2,885 கோடி மதிப்பிலான பல்வேறு வளர்ச்சி திட்டங்களுக்கு நேற்று அடிக்கல் நாட்டினார். நிகழ்ச்சியில் பேசிய அவர், திமுக ஆட்சி மக்கள் நலனுக்காக செயல்பட்டு வருவதாக தெரிவித்தார். ஓசூரில் இருந்து கிருஷ்ணகிரி வரை, வழிநெடுக மக்களின் உற்சாக வரவேற்பு கிடைத்ததாக கூறிய முதலமைச்சர், இதனால் நிகழ்ச்சிக்கு நேரத்தில் வர இயலாமல் போனதாகத் தெரிவித்தார்.

தொடர்ந்து பேசிய அவர் கூறியதாவது:

திமுக ஆட்சி அமைந்த பிறகு, கிருஷ்ணகிரி மாவட்டம் பல்வேறு துறைகளில் கணிசமான வளர்ச்சி கண்டுள்ளது. திமுக ஆட்சியில் தான், மாவட்டத்துக்கு எண்ணற்ற திட்டங்கள் கொண்டு வரப்பட்டுள்ளன. “மக்களை தேடி மருத்துவம்” திட்டம், முதன்முதலில் கிருஷ்ணகிரியில் தொடங்கப்பட்டது என்பது முக்கிய சாதனை. கடந்த 10 ஆண்டுகளாக இருந்த அதிமுக ஆட்சியை விட, தற்போதைய 4.5 ஆண்டு திமுக ஆட்சியில் நெல்கொள்முதல் அதிகரித்துள்ளது.நகர்ப்புற பகுதிகளுக்கும், ஊரகப்போல் இலவச வீட்டுமனை பட்டா வழங்கப்பட்டு வருகிறது.

அதன்பிறகு ஓசூர் அரசு மருத்துவமனையின் மேம்பாட்டுக்காக ரூ.100 கோடி ஒதுக்கீடு செய்யப்படும்.கிருஷ்ணகிரி மாவட்டத்தின் அஞ்சட்டியை தலைமையிடமாகக் கொண்டு புதிய ஊராட்சி ஒன்றியம் உருவாக்கப்படும். கெலமங்கலத்தில் போக்குவரத்து நெரிசலைக் குறைக்கும் புறவழிச்சாலை அமைப்பதற்கான சாத்தியக்கூறு அறிக்கை தயாரிக்கப்படும்.அதே பகுதியில் ரூ.12 கோடி மதிப்பில் சாலைகள் அமைக்க திட்டமிடப்பட்டுள்ளது. ஓசூரில் எல்சி 104 ரெயில்வே கேட் பகுதியில் புதிய மேம்பாலம் அமைக்கப்படும். ஓர் பகுதியில் NH 44 மற்றும் 844 சாலைகளை இணைக்கும் புதிய சாலைக்கான சாத்தியக்கூறு அறிக்கையும் தயாரிக்கப்படும்.

மேலும் எதிர்க்கட்சிகள் திமுக ஆட்சி வாக்குறுதிகளை நிறைவேற்றவில்லை என பொய்களை பரப்புவதாகக் குற்றம் சாட்டிய முதலமைச்சர், “நாம் சொல்லாத வாக்குறுதிகளையும் நிறைவேற்றியுள்ளோம். பொய்களை பரப்புபவர்கள் மீது பதிலளிக்க வேண்டிய அவசியம் இல்லை. திமுக ஆட்சி மீது எதிர்க்கட்சிகளுக்கு வயித்தெரிச்சல். அவர்கள் செய்கின்றது மலிவான அரசியல் மட்டுமே” என்றார். மேலும் இதற்கு 2026 தேர்தலில் பதில் அளிக்கப்படும் என்றார்.