அ.தி.மு.க. பொதுச்செயலாளர் எடப்பாடி கே. பழனிசாமி மற்றும் முன்னாள் அமைச்சர் கே.ஏ. செங்கோட்டையன் இடையே, கடந்த சில மாதங்களாக கட்சியின் ஒன்றிணைவு தொடர்பாக கருத்து வேறுபாடுகள் நிலவி வந்தது. இருவரும் பல முறை இதுகுறித்து வெளிப்படையாக கருத்து தெரிவித்ததால், அ.தி.மு.க.வில் பரபரப்பு ஏற்பட்டிருந்தது.

இந்த நிலையில், கட்சி ஒன்றிணைவு குறித்து எடப்பாடி பழனிசாமிக்கு ‘காலக் கட்டம் நிர்ணயிக்கிறேன்’ என்று செங்கோட்டையன் தெரிவித்தது, விவகாரத்தை மேலும் சிக்கலாக்கியது. இதைத் தொடர்ந்து, செங்கோட்டையன் மற்றும் அவரின் ஆதரவாளர்களின் கட்சி பதவிகள் ரத்து செய்யப்பட வேண்டுமென எடப்பாடி பழனிசாமி உத்தரவிட்டார். பின்னர், செங்கோட்டையனை அ.தி.மு.க.வில் இருந்து நீக்கும் அதிரடி அறிவிப்பும் வெளியிடப்பட்டது.

தனது நீக்கத்துக்கு எதிராக நீதிமன்றத்தில் வழக்கு தொடரப் போவதாக செங்கோட்டையன் அறிவித்துள்ளார்.

இதனைத் தொடர்ந்து, அ.தி.மு.க.வில் இருந்து நீக்கப்பட்ட முன்னாள் அமைச்சர் கே.ஏ. செங்கோட்டையன், நடிகர் விஜய் தலைமையிலான தமிழக வெற்றிக்கழகத்தில் இணைவார் என்ற தகவல் சமூக வலைதளங்களில் வேகமாக பரவி வருகிறது. வருகிற 27ஆம் தேதி நடிகர் விஜய் முன்னிலையில் அவர் த.வெ.க.வில் சேர உள்ளார் என்பதும் அந்த தகவல்களில் கூறப்படுகிறது. அவர் விஜயை சந்தித்து பேசியதாகவும் கூறப்படுகிறது.

ஆனால், இந்த தகவல் தொடர்பாக செங்கோட்டையன் தரப்பிலும், த.வெ.க. தரப்பிலும் இதுவரை எந்த அதிகாரப்பூர்வ அறிக்கையும் வெளியாகவில்லை. எனவே, இது உண்மையா அல்லது வதந்தியா என்பது தெளிவாகத் தெரியவில்லை. இருந்தாலும், இந்த செய்தி அரசியல் வட்டாரத்தில் புதிய பரபரப்பை உருவாக்கியுள்ளது.