தமிழக முதலமைச்சர் சி. ஜோசப் விஜய்யின் பிறந்தநாளை முன்னிட்டு விருதுநகர் மாவட்டம் சிவகாசியில் நடைபெற்ற அரசு நலத்திட்ட உதவிகள் வழங்கும் விழாவில், ஆளுங்கட்சியான தவெகவின் இரு தரப்பினரிடையே ஏற்பட்ட பயங்கர மோதலில் அமைச்சர் கீர்த்தனாவின் வரவேற்பு பேனர்கள் கிழிக்கப்பட்ட சம்பவம் பெரும் பரபரப்பை ஏற்படுத்தியுள்ளது.
சிவகாசி சட்டமன்றத் தொகுதியில் முதலமைச்சரின் பிறந்தநாள் விழாவை முன்னிட்டு அமைச்சர் கீர்த்தனா ஆதரவாளர்கள் ஒரு பிரிவாகவும், தவெக மாவட்ட செயலாளர் மாரிச்செல்வம் ஆதரவாளர்கள் மற்றொரு பிரிவாகவும் போட்டிப் பொதுக்கூட்டங்கள் மற்றும் நலத்திட்ட உதவிகள் வழங்கும் விழாக்களை தனித்தனியே ஏற்பாடு செய்து வருகின்றனர்.
இந்நிலையில், நேற்று காலை விசுவநத்தம் பகுதியில் உள்ள ஒரு தனியார் திருமண மண்டபத்தில் அமைச்சர் கீர்த்தனா தலைமையில் நலத்திட்ட உதவிகள் வழங்கும் விழா நடைபெற்றுக் கொண்டிருந்தபோது, அங்கு வந்த மாவட்ட செயலாளரின் ஆதரவாளர்களுக்கும் அமைச்சரின் ஆதரவாளர்களுக்கும் இடையே திடீரென வாய்த்தகராறு ஏற்பட்டு, பின்னர் அது ஒருவரையொருவர் தாக்கிக்கொள்ளும் அளவுக்குக் கலவரமாக மாறியது.
இந்த மோதலின்போது மண்டபத்தின் வெளியே வைக்கப்பட்டிருந்த அமைச்சர் கீர்த்தனாவின் பிரம்மாண்ட வரவேற்பு பேனர்கள் கிழித்து எறியப்பட்டதால் அப்பகுதியில் பதற்றம் நிலவியது.
இந்த பரபரப்பு அடங்குவதற்குள், அதே பகுதியில் மாவட்ட செயலாளர் மாரிச்செல்வம் ஏற்பாடு செய்திருந்த மற்றொரு போட்டி நலத்திட்ட உதவிகள் வழங்கும் விழாவில் தவெகவின் மற்றொரு மூத்த அமைச்சரான ஜெகதீஸ்வரி பங்கேற்றது உட்கட்சிப் பூசலை மேலும் அம்பலப்படுத்தியுள்ளது.
அந்தப் பொதுக்கூட்டத்தில் பேசிய அமைச்சர் ஜெகதீஸ்வரி, இப்பகுதி மக்கள் தங்களுக்குத் தேவையான அரசு நலத்திட்ட உதவிகளைப் பெற வேண்டும் என்றால் மாவட்ட செயலாளர் மாரிச்செல்வத்திடம் மட்டுமே மனுக்களைக் கொடுக்க வேண்டும் என்றும், அவர் எனது கவனத்திற்குக் கொண்டு வரும் மனுக்கள் மீது மட்டுமே நான் உடனடியாகத் துறை ரீதியான துரித நடவடிக்கை எடுப்பேன் என்றும் பகிரங்கமாக மேடையில் அறிவித்தார்.
அமைச்சர்கள் இருவரின் வெவ்வேறு ஆதரவு நிலைகளும், ஆளுங்கட்சிக்குள்ளேயே வெடித்துள்ள இந்த கோஷ்டி மோதலும் விருதுநகர் மாவட்ட அரசியல் வட்டாரத்தில் தற்போது பெரும் பேசுபொருளாக மாறியுள்ளது.
