தமிழகத்தின் புதிய முதலமைச்சராகப் பொறுப்பேற்றுள்ள தமிழக வெற்றிக் கழகத்தின் (தவிக) தலைவர் சி. ஜோசப் விஜய், முதன்முறையாக நாட்டின் தலைநகரான டெல்லிக்கு அரசுமுறைப் பயணம் மேற்கொள்ளத் திட்டமிட்டுள்ளார்.

வரும் மே 22-ஆம் தேதி (வெள்ளிக்கிழமை) அவர் டெல்லிக்குச் செல்லவிருப்பதாக அதிகாரப்பூர்வ தகவல்கள் வெளியாகியுள்ளன. முதலமைச்சராகப் பதவியேற்ற பிறகு அவர் மேற்கொள்ளும் முதல் டெல்லி பயணம் இது என்பதால், தமிழக அரசியல் வட்டாரத்திலும் தேசிய அளவிலும் இந்த விசிட் பெரும் எதிர்பார்ப்பை ஏற்படுத்தியுள்ளது.

இந்த முக்கியப் பயணத்தின் போது, பிரதமர் நரேந்திர மோடியை முதலமைச்சர் விஜய் நேரில் சந்தித்துப் பேசுகிறார். இது ஒரு மரியாதை நிமித்தமான சந்திப்பு என்று கூறப்பட்டாலும், தமிழகத்தின் வளர்ச்சித் திட்டங்கள், நிதி ஆதாரங்கள் மற்றும் மாநில நலன்கள் சார்ந்த முக்கியக் கோரிக்கைகள் குறித்து பிரதமரிடம் அவர் விவாதிக்க உள்ளதாகத் தெரிகிறது.

பிரதமர் மோடி தவிர, குடியரசுத் தலைவர் திரௌபதி முர்மு, மத்திய உள்துறை அமைச்சர் அமித்ஷா மற்றும் மத்திய நிதியமைச்சர் நிர்மலா சீதாராமன் ஆகியோரையும் மே 22 அன்று முதலமைச்சர் விஜய் தனித்தனியாகச் சந்தித்து வாழ்த்துப் பெற உள்ளார். இந்த அதிரடி டெல்லி விசிட் அரசியல் அரங்கில் தற்போதே பெரும் பரபரப்பைக் கிளப்பியுள்ளது.