தமிழக சட்டமன்றத் தேர்தல் குறித்த ‘ஆக்சிஸ் மை இந்தியா’வின் சமூக ரீதியிலான கணிப்புகள், நீண்டகாலமாக இருந்த ஜாதி ரீதியிலான ஓட்டு வங்கிகளில் பெரும் மாற்றங்கள் ஏற்பட்டுள்ளதைக் காட்டுகின்றன. குறிப்பாக, பட்டியலின மக்களின் கணிசமான ஆதரவு நடிகர் விஜய்யின் தமிழக வெற்றிக் கழகத்திற்கு (தவெக) சாதகமாக மாறியுள்ளது. இது திமுக மற்றும் அதிமுக ஆகிய இரு கட்சிகளுக்கும் பெரும் சவாலாகப் பார்க்கப்படுகிறது.
அதிமுகவின் கோட்டையாகக் கருதப்படும் கொங்கு மண்டலத்தில், கொங்கு வெள்ளாள கவுண்டர் சமூகத்தினர் மத்தியில் அதிமுகவிற்குப் பலத்த சரிவு ஏற்பட்டுள்ளதாகவும், அந்த வாக்குகள் தவெக-விற்கு ஆதரவாகத் திரும்பியுள்ளதாகவும் இக்கணிப்பு கூறுகிறது. இருப்பினும், வன்னியர் மற்றும் பிராமணர் சமூகத்தினர் மத்தியில் அதிமுக தனது செல்வாக்கைத் தக்கவைத்துக் கொண்டுள்ளது. ஜாதி மற்றும் மண்டல ரீதியான இந்த மாற்றங்கள், தமிழக அரசியலில் ஒரு புதிய அதிகாரப் போட்டியை உருவாக்கியுள்ளன.
