தர்மபுரி மாவட்டம் வெண்ணாம்பட்டி பகுதியை சேர்ந்த கோமதி (28), கடந்த 8 ஆண்டுகளாக திருமணமாகி பெண் குழந்தையுடன் வாழ்ந்துவருகிறார். கணவன்-மனைவிக்குள் ஏற்பட்ட குடும்ப தகராறால், கோமதி தனது பெற்றோர் வீட்டில் தங்கியிருந்தார்.

அவரது கணவர் அடிக்கடி சென்று வாக்குவாதத்தில் ஈடுபட்டதால், கோமதி கடந்த 2 ஆண்டுகளுக்கு முன்பு தர்மபுரி டவுன் போலீசில் புகார் அளிக்க முயன்றுள்ளார். ஆனால் அங்கு பணியாற்றிய சப்-இன்ஸ்பெக்டர், பாப்பாரப்பட்டி காவல் நிலையத்தில் புகார் அளிக்குமாறு கூறியுள்ளார்.

அதன்படி கோமதி பாப்பாரப்பட்டி போலீசில் பணியாற்றும் தனிப்பிரிவு சிறப்பு சப்-இன்ஸ்பெக்டர் ராஜாராமை (54) தொடர்பு கொண்டுள்ளார். முதலில் உதவிகர உறவாக தொடங்கிய அவர்களது பழக்கம், பின்னர் கள்ளக்காதலாக மாறியது.

இதையடுத்து ராஜாராம், தர்மபுரி ஒட்டப்பட்டி காமராஜ் நகரில் தனி வீடு எடுத்து, கோமதியை அங்கு தங்க வைத்து, கணவன் மனைவியாக வாழ்ந்தார். இது குறித்த தகவல் ராஜாராமின் குடும்பத்தினருக்கு தெரியவந்ததால், அவர் கோமதியை தவிர்க்க ஆரம்பித்தார். இதனால் இருவருக்கும் இடையே அடிக்கடி தகராறு ஏற்பட்டது.

இந்தத் தொடரில் சமீபத்தில் கோமதியின் ஜாதகத்தை ராஜாராம் பெற்று, அதில் பிரச்சனை இருப்பதாக கூறி பரிகார பூஜை செய்ய வேண்டும் எனக் கூறினார். இதற்காக கோமதியை தடங்கம் அருகே உள்ள பெருமாள்கோவில் மேட்டிற்கு அழைத்து, கிணற்றில் தண்ணீர் எடுத்து வருமாறு கூறியுள்ளார்.

கோமதி குடத்தில் கயிறு கட்டி தண்ணீர் எடுத்து கொண்டிருந்தபோது, ராஜாராம் திடீரென அவரை கிணற்றில் தள்ளிவிட்டு அங்கிருந்து தப்பி ஓடியதாக கூறப்படுகிறது.

சத்தம் கேட்டு ஓடி வந்த பொதுமக்கள் கோமதியை மீட்டு தர்மபுரி அரசு மருத்துவமனையில் சேர்த்தனர். சம்பவம் குறித்து அதியமான்கோட்டை போலீசார் விசாரணை மேற்கொண்டனர்.

கோமதி அளித்த முறைப்பாட்டின் அடிப்படையில், தனிப்பிரிவு சிறப்பு சப்-இன்ஸ்பெக்டர் ராஜாராம் மீது கொலை முயற்சி குற்றச்சாட்டில் வழக்குப் பதிவு செய்து கைது செய்தனர்.