மத்திய பிரதேச மாநிலம் உஜ்ஜயினி மாவட்டத்தில் தேசிய நெடுஞ்சாலை வழியாக ஒரு தம்பதியினர் காரில் பயணம் செய்து கொண்டிருந்தனர். அப்போது, அவர்களை வழிமறித்த சிலர், தங்கள் உடல் முழுவதும் சாம்பலைப் பூசிக்கொண்டு, விசித்திரமான மந்திரங்களைச் சொல்வது போலப் பேசினர். அவர்கள் அந்தத் தம்பதியினரிடம், “நீங்கள் நாங்கள் கேட்பதைக் கொடுக்கவில்லை என்றால், உங்களை மந்திரம் சொல்லி எரித்து சாம்பலாக்கி விடுவோம்” என்று கூறி மிரட்டினர். பயந்துபோன தம்பதியினர், இந்த மிரட்டல் சம்பவத்தை தங்கள் செல்போனில் வீடியோவாகப் பதிவு செய்துகொண்டனர். பிறகு, எப்படியோ அந்த இடத்திலிருந்து தப்பி வந்த அவர்கள், நடந்ததைப் பற்றி உடனடியாகப் போலீசாரிடம் புகார் அளித்தனர்.

அந்தப் புகாரின் அடிப்படையில், காவல்துறையினர் உடனடியாகச் சம்பவ இடத்திற்கு விரைந்து சென்று தீவிர சோதனை நடத்தினர். அப்போது, சாலையில் செல்லும் வாகன ஓட்டிகளை மிரட்டிப் பணம் பறிக்கும் செயலில் ஈடுபட்ட 7 போலி சாமியார்கள் சிக்கினர். போலீஸ் விசாரணையில், தங்களுக்கு வேலை எதுவும் இல்லாததால், சாமியார் வேடம் போட்டு இவ்வாறு மிரட்டிப் பணம் பறிக்கத் திட்டமிட்டதாக அவர்கள் ஒப்புக்கொண்டனர். மக்களை மிரட்டி பணம் பறிக்க முயன்ற இந்த மோசடி கும்பலைக் காவல்துறையினர் கைது செய்தனர்.