தமிழ்நாடு வேலூர் மாவட்டம் பொன்னை ஆற்றின் குறுக்கே கட்டப்பட்டு வரும் தடுப்பணையை நேரில் பார்வையிட்டு ஆய்வு செய்த பின், திமுக முன்னாள் அமைச்சர் துரைமுருகன் செய்தியாளர்களிடம் பேசிய எமோஷனலான கருத்துக்கள் தற்போது அரசியல் வட்டாரத்திலும், சமூக வலைதளங்களிலும் பெரும் பரபரப்பை ஏற்படுத்தியுள்ளது. அண்மையில் நடந்து முடிந்த தேர்தலில் இந்த தொகுதியில் பின்னடைவை சந்தித்தது குறித்து செய்தியாளர்கள் கேள்வி எழுப்பிய போது, “இந்த தொகுதி மக்கள் ஏதோ ஒரு சிறு பிள்ளைத்தனமாக ஒரு காரியத்தை செய்து விட்டார்கள் என்பதற்காக, நான் இந்த தொகுதியையோ அல்லது எனது மக்களையோ ஒட்டுமொத்தமாக வெறுக்கிறவன் அல்ல” என்று தனது தாராள மனதை வெளிப்படுத்தியுள்ளார்.

​மேலும் தொடர்ந்து பேசிய அவர், பொன்னையில் கட்டப்பட்டு வரும் இந்த தடுப்பணையானது தான் பெற்ற பிள்ளையைப் போன்றது என்றும், அதனால் தான் இதனை நேரில் பார்ப்பதற்காக வந்ததாகவும் நெகிழ்ச்சியுடன் குறிப்பிட்டார். தேர்தல் முடிவுகள் குறித்து எவ்வித கவலையும் இன்றி பேசிய துரைமுருகன், “நாளை மறுநாள் மீண்டும் ஒரு தேர்தல் வைத்தால் கூட, நான் தான் அதில் அமோக வெற்றி பெறுவேன்” என்று மிகுந்த நம்பிக்கையுடன் அதிரடியாகக் கூறினார். மக்கள் மீதான தனது பாசத்தையும், அரசியல் செல்வாக்கையும் ஒரே நேரத்தில் வெளிப்படுத்திய முன்னாள் அமைச்சர் துரைமுருகனின் இந்த பேச்சு, தற்போது இணையத்தில் காட்டுத்தீ போல பரவி வருகிறது.