மகாராஷ்டிர மாநிலம் சத்ரபதி சம்பாஜிநகரில் போக்குவரத்து காவல்துறையினரின் நடவடிக்கையால் ஆத்திரமடைந்த கார் உரிமையாளர் ஒருவர், தனது சொந்த ஸ்கோடா காரையே தீயிட்டு கொளுத்திய சம்பவம் அப்பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது.
போக்குவரத்து நெரிசலைக் கட்டுப்படுத்த காவல்துறையினர் அவ்வப்போது விதிமுறைகளை மீறி நிறுத்தப்படும் வாகனங்களுக்கு ஜாமர் பூட்டு போடுவது வழக்கம். அதேபோல், நோ-பார்க்கிங் பகுதியில் நிறுத்தப்பட்டிருந்ததாகக் கூறி, அந்த நபரின் ஸ்கோடா காரின் சக்கரத்திற்குப் போக்குவரத்து காவலர்கள் ஜாமர் பூட்டைப் போட்டுள்ளனர்.
கார் உரிமையாளர் சம்பவ இடத்திற்கு வந்து, “நான் இப்போதுதானே ஐயா காரை நிறுத்தினேன்” என்று காவல்துறையினரிடம் கெஞ்சிக் கேட்டுள்ளார். மேலும், உடனடியாக ஜாமரை எடுக்குமாறு அவர் பலமுறை முறையிட்டும், அதிகாரிகள் அதை அகற்ற மறுத்து அபராதம் செலுத்த வலியுறுத்தியதாகக் கூறப்படுகிறது.
அதிகாரிகளின் இந்த அலட்சியமானப் போக்கினாலும் கோபத்தினாலும் நிதானத்தை இழந்த கார் உரிமையாளர், சட்டெனத் தனது காரில் இருந்த எரிபொருளைப் பயன்படுத்தித் தனது சொந்த சொத்தான ஸ்கோடா காரிலேயே தீயைப் பற்ற வைத்துள்ளார். கண் இமைக்கும் நேரத்திற்குள் கார் முழுவதும் தீப்பற்றி எரியத் தொடங்கியதைக் கண்டு, அங்கிருந்த பொதுமக்கள் மற்றும் போக்குவரத்துப் போலீசார் அதிர்ச்சியில் உறைந்துபோயினர்.
தகவலறிந்து சம்பவ இடத்திற்கு விரைந்து வந்த தீயணைப்புத் துறையினர் தீயைக் கட்டுக்குள் கொண்டுவந்த போதிலும், கார் முற்றிலும் எரிந்து சாம்பலானது. பொது இடத்தில் தனக்கே சொந்தமான காரைக் கொளுத்திப் பெரும் பரபரப்பை ஏற்படுத்திய கார் ஓட்டுநரை காவல் துறையினர் உடனடியாகக் கைது செய்து, சம்பவம் குறித்துத் தீவிர விசாரணை மேற்கொண்டு வருகின்றனர்.
இந்நிலையில் சட்டத்தின் இறுக்கமும், சாமானிய மனிதனின் உடனடி ஆத்திரமும் சேர்ந்து எவ்வாறு ஒரு விபரீதமான முடிவுக்கு வழிவகுக்கும் என்பதற்கு இந்த நிகழ்வு ஒரு கசப்பான உதாரணமாக அமைந்துள்ளது.
