ஐஎஸ்ஐஎஸ் (ISIS) பயங்கரவாத அமைப்பின் கொடூரங்கள் உலகம் அறிந்ததே. ஆனால், அது வெறும் கொலைகளுடன் மட்டும் நிற்கவில்லை என்பதை நிரூபிக்கும் வகையில், தற்போது ஒரு நீதிமன்றத்தில் பகிரங்கமாக ஆதாரங்கள் வெளியாகியுள்ளன. ஆஸ்திரேலிய நீதிமன்றம் ஒன்றில், இந்த பயங்கரவாத அமைப்பின் முன்னாள் ‘துணைவி’ ஒருவருக்கு எதிராக நடந்த விசாரணையின்போது, பெண்களை அடிமைகளாகக் கொள்வது தொடர்பான ஐஎஸ்ஐஎஸ் அமைப்பின் அந்த அருவருக்கத்தக்க கையேடுகள் மற்றும் ஆவணங்கள் சமர்ப்பிக்கப்பட்டுள்ளன.

​இந்த ஆவணங்கள், பெண்களை மனிதர்களாகக் கூட மதிக்காமல், அவர்களைக் கொள்முதல் செய்யவும், விற்கவும், பரிமாறிக்கொள்ளவும் கூடிய வெறும் பொருளாக அந்த அமைப்பு பார்த்ததை உலகிற்குத் தோலுரித்துக் காட்டியுள்ளன. குறிப்பாக, 2014-ல் ஈராக் மீது தாக்குதல் நடத்தியபோது, ஆயிரக்கணக்கான யசீதி பெண்கள் மற்றும் குழந்தைகளைக் கடத்தி, அவர்களைத் தங்கள் போராளிகளுக்கு இடையே ஏலம் விட்டு, பாலியல் வன்முறைக்கு ஆளாக்கியது உள்ளிட்ட மனிதகுலமே வெட்கித் தலைகுனிய வேண்டிய குற்றங்கள் இந்த ஆவணங்கள் மூலம் உறுதி செய்யப்பட்டுள்ளன.

இத்தகைய அநாகரீகச் செயல்களைத் தங்கள் மத ரீதியான செயல் என்று கூறி நியாயப்படுத்திய இவர்களது செயல்கள், உலகின் மிக மோசமான மனித உரிமை மீறலாகப் பார்க்கப்படுகிறது. ஆயிரக்கணக்கானோர் இன்றும் காணாமல் போயிருக்கும் நிலையில், இந்த நீதிமன்ற ஆவணங்கள் பாதிக்கப்பட்ட குடும்பங்களுக்கு ஒருவிதமான கசப்பான உண்மையை மீண்டும் நினைவூட்டியுள்ளன.