அமெரிக்காவின் ஜார்ஜியா மாகாணத்தில், கூகுள் நிறுவனத்தில் உயர் பதவியில் வகித்து வந்த இந்திய வம்சாவளியைச் சேர்ந்த பெண் தொழில்நுட்ப வல்லுநர் ஷீத்தல் என்பவர், அவரது கணவராலேயே துப்பாக்கியால் சுட்டுக் கொல்லப்பட்ட அதிர்ச்சிச் சம்பவம் அரங்கேறியுள்ளது. குடும்பத் தகராறு காரணமாக ஏற்பட்ட இந்த மோதலில், கணவன் நடத்திய தறிகெட்ட துப்பாக்கிச் சூட்டில் ஷீத்தல் சம்பவ இடத்திலேயே ரத்த வெள்ளத்தில் பரிதாபமாக உயிரிழந்தார். இந்தத் தாக்குதலின் போது தம்பதியரின் மகனும் படுகாயமடைந்த நிலையில், அவர் சிகிச்சைக்காக மருத்துவமனையில் அனுமதிக்கப்பட்டுள்ளார்.

சம்பவம் குறித்துத் தகவல் அறிந்து விரைந்து வந்த அமெரிக்கக் காவல்துறையினர், துப்பாக்கிச் சூடு நடத்திவிட்டுத் தப்பியோட முயன்ற கணவனைச் சம்பவ இடத்திலேயே சுற்றி வளைத்து அதிரடியாகக் கைது செய்தனர். அவர் மீது வழக்குப்பதிவு செய்யப்பட்டுத் தீவிர விசாரணை நடத்தப்பட்டு வருகிறது. அமெரிக்காவில் இந்திய வம்சாவளி உயர் அதிகாரி ஒருவர் சொந்தக் கணவராலேயே சுட்டுக் கொல்லப்பட்ட இந்தத் துயரச் சம்பவம், அங்குள்ள இந்தியச் சமூகத்தினரிடையே பெரும் சோகத்தையும் அதிர்ச்சியையும் ஏற்படுத்தியுள்ளது.