மழைக்கால கூட்டத்தொடர் தொடங்கியுள்ள நிலையில், டெல்லியில் நேற்று நடந்த மாணவர்கள் போராட்டத்தின் போது காவல்துறை நடத்திய கொடூர தாக்குதலுக்குப் பொறுப்பேற்று பிரதமர் மோடி பகிரங்கமாக மன்னிப்பு கேட்க வேண்டும் என்றும், உள்துறை அமைச்சர் அமித்ஷா மற்றும் கல்வி அமைச்சர் தர்மேந்திர பிரதான் ஆகியோர் உடனடியாகப் பதவி விலக வேண்டும் என்றும் மக்களவை எதிர்க்கட்சித் தலைவர் ராகுல் காந்தி அதிரடியாக வலியுறுத்தியுள்ளார்.
நாடாளுமன்ற வளாகத்தில் செய்தியாளர்களைச் சந்தித்த ராகுல் காந்தி, “கரப்பான் பூச்சி ஜனதா கட்சியின் பேரணியில் மாணவர்கள் மீது நடத்தப்பட்ட தடியடி தாக்குதலுக்கு மத்திய அரசுதான் முழுப் பொறுப்பேற்க வேண்டும். இது தொடர்பாக மக்களவை சபாநாயகர் ஓம் பிர்லாவைச் சந்தித்து, மாணவர் பிரச்சினை குறித்து விவாதிக்க எதிர்க்கட்சிகள் விரும்புவதாகத் தெரிவித்துள்ளோம். அவர் அரசிடம் இது குறித்துக் கேட்க வேண்டும்” என்று கூறினார்.
தொடர்ந்து பேசிய அவர், “நாட்டின் கல்வி முறையும் தேர்வு முறையும் முற்றிலுமாகச் சீர்குலைந்து போய்விட்டது என்பது நாடு முழுவதற்கும் தெரியும். இந்தச் சீர்கேடுகளுக்கு எதிராகப் போராடும் மாணவர்கள் மீது காவல்துறையினர் வன்முறையைக் கட்டவிழ்த்து விட்டிருப்பது முற்றிலும் ‘இந்தியப் பண்பாட்டிற்கு மாறானது’. இவ்வளவு கொடூரம் நடந்தும் பிரதமர் மோடி இதுவரை மன்னிப்பு கூட கேட்காமல் மௌனம் காப்பது ஏன்?” என ஆவேசமாகக் கேள்வி எழுப்பினார்.
மேலும், கல்வி அமைச்சர் தர்மேந்திர பிரதானின் ராஜினாமாவை வலியுறுத்திப் போராடிய இளைஞர்கள் மீது கண்ணீர்ப்புகைக் குண்டுகளையும் தடியடியையும் வீசியது மத்திய உள்துறை அமைச்சகத்தின் கீழ் இயங்கும் டெல்லி காவல்துறைதான் என்று சுட்டிக்காட்டிய ராகுல் காந்தி, இதற்குப் பொறுப்பேற்று மத்திய உள்துறை அமைச்சர் அமித்ஷாவும், அவருக்குத் தலைமை தாங்கும் பிரதமர் மோடியும், கல்வி அமைச்சரும் உடனடியாகத் தங்களின் பதவிகளை ராஜினாமா செய்ய வேண்டும் என்று அதிரடியாகத் தெரிவித்தார். ராகுல் காந்தியின் இந்தச் சீற்றமான பேட்டி தற்போது தேசிய அளவில் பெரும் பரபரப்பை ஏற்படுத்தியுள்ளது.
