இந்தியாவில் சுற்றுப்பயணம் செய்ய உள்ள ஆப்கானிஸ்தான் கிரிக்கெட் அணிக்கு எதிரான ஒரே ஒரு டெஸ்ட் போட்டி ஜூன் 6ஆம் தேதி தொடங்க உள்ள நிலையில், இந்திய ஆடவர் கிரிக்கெட் அணியின் புதிய சுழற்பந்து வீச்சு பயிற்சியாளராக (Spin Bowling Coach) முன்னாள் லெக் ஸ்பின்னர் சாய்ராஜ் பஹுதுலேயை பிசிசிஐ (BCCI) அதிரடியாக நியமித்துள்ளது.

ஐபிஎல் 2026 தொடரில் பஞ்சாப் கிங்ஸ் அணிக்கும், அதற்கு முன்பு ராஜஸ்தான் ராயல்ஸ் அணிக்கும் பயிற்சியாளராகச் செயல்பட்ட அனுபவம் கொண்ட இவர், இந்திய அணியின் தலைமை பயிற்சியாளர் கௌதம் கம்பீருடன் இணைந்து பணியாற்ற உள்ளார். ஐபிஎல் 2026 தொடர் முடிந்த கையோடு இந்திய அணி விளையாடப் போகும் முதல் ரெட்-பால் (டெஸ்ட்) கிரிக்கெட் தொடர் இதுவாகும்.

சுப்மன் கில் தலைமையில் களம் காணும் இந்திய அணியில், இந்த டெஸ்ட் போட்டிக்குப் பிறகு ஜூன் 14 முதல் ஜூன் 20 வரை நடக்கவுள்ள 3 போட்டிகள் கொண்ட ஒருநாள் தொடரும் அடங்கும். 1997 முதல் 2003 வரை இந்திய அணிக்காக 2 டெஸ்ட் மற்றும் 8 ஒருநாள் போட்டிகளில் விளையாடியுள்ள சாய்ராஜ் பஹுதுலே, உள்நாட்டு கிரிக்கெட்டில் 630 விக்கெட்டுகளை வீழ்த்தி பெரும் சாதனை படைத்தவர் என்பதால், அவரது வருகை இந்திய அணியின் சுழற்பந்து வீச்சை மேலும் வலுப்படுத்தும் என்று எதிர்பார்க்கப்படுகிறது.