பொதுமக்கள் ஏடிஎம் (ATM) மையங்களில் பணம் எடுக்கும் போது மிகவும் எச்சரிக்கையாக இருக்க வேண்டும் என்பதை உணர்த்தும் வகையில், உத்தரபிரதேச மாநிலம் பிரயாக்ராஜில் ஏடிஎம் இயந்திரங்களை குறிவைத்து மர்ம நபர்கள் நடத்தி வரும் ஒரு அதிர்ச்சிகரமான புதுவகை மோசடி வெளிச்சத்திற்கு வந்து பெரும் பரபரப்பை ஏற்படுத்தியுள்ளது.

அங்குள்ள ஏடிஎம் இயந்திரங்களில் பணம் வெளியே வரும் பகுதியான கேஷ் ட்ரேயில் (Cash Tray) மர்ம நபர்கள் திட்டமிட்டு டேப் (Tape) ஒட்டி வைத்துள்ளனர். இதன் காரணமாக, வாடிக்கையாளர்கள் தங்களது கார்டுகளை பயன்படுத்தி பணம் எடுக்கும் போது, அவர்களது வங்கி கணக்கில் இருந்து பணம் கழிக்கப்பட்டாலும் (Debited), இயந்திரத்திற்குள் ஒட்டப்பட்டுள்ள டேப்பினால் பணம் வெளியே வர முடியாமல் உள்ளேயே சிக்கிக் கொள்கிறது.

இதனால் தொழில்நுட்ப கோளாறு காரணமாக பணம் வரவில்லை என்று நினைத்து ஏமாற்றத்துடன் வாடிக்கையாளர்கள் அங்கிருந்து சென்றவுடன், வெளியில் காத்திருக்கும் இந்த மோசடி கும்பல் நைசாக உள்ளே புகுந்து, கேஷ் ட்ரேயில் ஒட்டிய டேப்பை எடுத்துவிட்டு உள்ளே சிக்கியிருக்கும் பணத்தை நூதன முறையில் திருடிச் சென்று விடுகின்றனர்.

தொழில்நுட்பத்தையே மிஞ்சும் வகையில் வடமாநிலத்தில் அரங்கேறி வரும் இந்த அதிநவீன ஏடிஎம் கொள்ளை குறித்து வெளியாகி உள்ள தகவல்கள், தற்பொழுது நெட்டிசன்கள் மத்தியில் மிகப்பெரிய அளவில் விவாதிக்கப்பட்டு சமூக வலைத்தளங்களில் அசுர வேகத்தில் ட்ரெண்டாகி வருகிறது.