தமிழகத்தில் 2026 சட்டமன்றத் தேர்தல் நெருங்கி வரும் வேளையில், தமிழக வெற்றிக் கழகத் தலைவர் விஜய் தனது அடுத்தகட்ட தேர்தல் பரப்புரைக்குத் தயாராகி வருகிறார். சமீபத்தில் ‘ஜன நாயகன்’ பட வெளியீட்டுச் சிக்கல்கள் மற்றும் சிபிஐ விவகாரங்கள் குறித்துப் பேசப்பட்ட நிலையில், விஜய் வேலூர் மாவட்டத்தில் தனது பரப்புரையை மேற்கொள்ளத் திட்டமிட்டுள்ளார். கடந்த ஈரோடு மாவட்ட பரப்புரைக்குப் பிறகு சுமார் இரண்டு மாதங்கள் இடைவெளி விட்டு, இந்த முக்கியப் பயணத்தை அவர் தொடங்கவுள்ளார்.

​காவல்துறையின் உரிய அனுமதி கிடைக்கும் பட்சத்தில், பிப்ரவரி மாதம் இரண்டாவது வாரத்தில் இந்தப் பரப்புரை மிகப்பிரம்மாண்டமாக நடைபெறும் எனத் தகவல்கள் வெளியாகியுள்ளன. வட தமிழகத்தின் முக்கியப் பகுதியான வேலூரில் விஜய் மேற்கொள்ளும் இந்தப் பயணம், அக்கட்சியினரிடையே பெரும் உற்சாகத்தை ஏற்படுத்தியுள்ளது. இந்தப் பரப்புரையின் போது விஜய் என்ன மாதிரியான கருத்துகளை முன்வைப்பார் என்பது அரசியல் வட்டாரங்களில் பெரும் எதிர்பார்ப்பைக் கிளப்பியுள்ளது.