அமெரிக்கா மற்றும் ஈரான் இடையேயான 24 நாள் போருக்குப் பிறகு, இரு நாடுகளும் போர்நிறுத்தத்திற்கான அதிரடி நிபந்தனைகளை முன்வைத்துள்ளன. ஈரான் முன்வைத்துள்ள 10 நிபந்தனைகளில், மத்திய கிழக்கிலிருந்து அமெரிக்கத் தளங்களை முற்றிலுமாக அகற்றுவது மற்றும் இனிமேல் தங்கள் மீது தாக்குதல் நடத்தப்படாது என்பதற்கான சர்வதேச உத்தரவாதம் ஆகியவை மிக முக்கியமானவை.

மேலும், தங்களுக்கு ஏற்பட்ட இழப்புகளுக்கு இழப்பீடு கோருவதோடு, ஐநா பாதுகாப்பு சபையில் வீட்டோ அதிகாரத்துடன் கூடிய நிரந்தர உறுப்பினர் இடத்தையும் ஈரான் வலியுறுத்துகிறது. இந்த நிபந்தனைகள் ஏற்கப்பட்டால், மத்திய கிழக்கு பிராந்தியத்தில் ஈரானின் ஆதிக்கம் அசைக்க முடியாததாக மாறும் என்று நிபுணர்கள் கருதுகின்றனர்.

மறுபுறம், அமெரிக்கா விதித்துள்ள 15 நிபந்தனைகள் ஈரானை ஒரு பலமற்ற நாடாக மாற்றும் நோக்கம் கொண்டவை. குறிப்பாக, ஈரான் தனது அணுசக்தித் திட்டங்களைக் கைவிட வேண்டும், முக்கிய அணு மையங்களை அழிக்க வேண்டும் மற்றும் ஹமாஸ் போன்ற அமைப்புகளுடனான உறவைத் துண்டிக்க வேண்டும் என்று அமெரிக்கா கூறுகிறது.

இது 2003-ல் லிபியாவின் கடாபி மீது விதிக்கப்பட்ட நிபந்தனைகளைப் போன்றே இருப்பதாகக் கருதப்படுகிறது. எட்டாண்டுகளுக்குப் பிறகு கடாபி தனது உயிரை இழந்தது போல, இந்த நிபந்தனைகளை ஏற்றால் ஈரானுக்கும் ஆபத்து நேரலாம் என்பதால், ஈரான் மிகவும் சாமர்த்தியமாக காய்களை நகர்த்தி வருகிறது. இரு தரப்பு பேச்சுவார்த்தையில் எட்டப்படும் முடிவுகளைப் பொறுத்தே மத்திய கிழக்கின் அமைதி அமையும்.