இந்தியாவின் மிகக் கடினமான தேர்வுகளில் ஒன்றான ஜே.இ.இ  நுழைவுத்தேர்வுக்குத் தயாராகும் 17 வயது மாணவர் ஒருவரின் தினசரி கால அட்டவணை சமூக வலைதளங்களில் வைரலாகி வருகிறது. அந்த மாணவர் அதிகாலை 4:30 மணிக்கு எழுந்து, நள்ளிரவு 12 மணி வரை இடைவிடாது படிக்கும் வகையில் தனது நேரத்தைத் திட்டமிட்டுள்ளார்.

ஒரு நாளைக்கு வெறும் 4.5 மணி நேரம் மட்டுமே அவர் உறங்குகிறார். பழைய பாடங்களைத் திருப்புதல், வகுப்புகளுக்குச் செல்லுதல், வீட்டுப்பாடங்கள் மற்றும் குறிப்புகள் எடுத்தல் என ஒவ்வொரு நிமிடத்தையும் படிப்பிற்காகவே அவர் ஒதுக்கியுள்ளது பலரையும் ஆச்சரியத்தில் ஆழ்த்தியுள்ளது.

இந்தக் கால அட்டவணையின் இறுதியில், “இந்த நாள் மீண்டும் உனக்குக் கிடைக்காது, அதனால் இதைச் சிறந்ததாக மாற்று” என்று அந்த மாணவர் எழுதியுள்ள வாசகம் பலருக்கு ஊக்கமளிப்பதாக உள்ளது. இருப்பினும், இவ்வளவு குறைவான நேர ஓய்வு ஒரு மாணவரின் உடல் மற்றும் மனநலத்தைப் பாதிக்கும் எனப் பலரும் கவலை தெரிவித்துள்ளனர்.

ஐ.ஐ.டி போன்ற உயர்கல்வி நிறுவனங்களில் சேருவதற்காக மாணவர்கள் எதிர்கொள்ளும் கடுமையான அழுத்தம் மற்றும் அவர்கள் செய்யும் தியாகங்கள் குறித்து இந்த வைரல் பதிவு மீண்டும் ஒரு பெரிய விவாதத்தை இணையத்தில் கிளப்பியுள்ளது.