தமிழகத்தில் போதைப்பொருள் புழக்கம் அதிகரித்துள்ளதாகக் குற்றம் சாட்டியுள்ள பாஜக மூத்த தலைவர் தமிழிசை சௌந்தரராஜன், திமுக அரசை கடுமையாக விமர்சித்துள்ளார்.

தமிழகத்தில் ‘ஜீரோ கஞ்சா’ என்று அரசு சொன்னாலும், உண்மையில் ‘கஞ்சா ஹீரோக்கள்’ தான் மாநிலம் முழுவதும் உலா வருகிறார்கள் என்றும், போதைப்பொருள் விற்பனை செய்பவர்களைக் கண்டறிவதை அரசு ரகசியமாக வைத்திருப்பது ஏன் என்றும் அவர் கேள்வி எழுப்பியுள்ளார்.

மேலும், உழைக்கும் பெண்களுக்கு அடிப்படை வசதிகள் கூட முறையாக இல்லை என்றும், ‘விடியல் ஆட்சி’ என்பது வெறும் விளம்பரமாகவே உள்ளது என்றும் அவர் சாடியுள்ளார்.

சென்னையில் போராடும் ஆசிரியர்களின் நிலை மற்றும் சாமானிய மக்களின் துயரங்களைச் சுட்டிக்காட்டிய தமிழிசை, தமிழகத்தில் உண்மையான விடியல் இன்னும் பிறக்கவில்லை என்று தெரிவித்தார்.

மக்கள் ஒரு பெரிய மாற்றத்தை விரும்புவதாகவும், 2026 சட்டமன்றத் தேர்தல் தமிழக அரசியலில் ஒரு திருப்புமுனையாக அமையும் என்றும் அவர் நம்பிக்கை தெரிவித்துள்ளார். தேசிய ஜனநாயகக் கூட்டணி வலுப்பெற்றால் மட்டுமே இத்தகைய பிரச்சினைகளுக்குத் தீர்வு கிடைக்கும் என்பதே அவரது கருத்தாக உள்ளது.