தமிழக வெற்றிக் கழகத்தின் பெண் நிர்வாகியான ரஞ்சனா, தனது வீட்டில் இப்போதும் அமித் ஷாவின் புகைப்படம் இருப்பதாக எழுந்துள்ள விமர்சனங்களுக்கு அதிரடியாகப் பதிலடி கொடுத்துள்ளார். தான் முன்னதாக பாஜகவில் இருந்தபோது செய்த பணிகளின் அடையாளமாகவே அந்தப் புகைப்படம் இருப்பதாகவும், அதனை மாற்றாத காரணத்திற்காகத் தன்னை ‘ஸ்லீப்பர் செல்’ என்று அழைத்தால் அதைப் பற்றித் தனக்குக் கவலையில்லை என்றும் அவர் கூறியுள்ளார். எதையும் மறைக்காமல் வெளிப்படையாகவே தான் இருப்பதாகக் குறிப்பிட்ட அவர், தற்போது கட்சிக்காக உண்மையாக உழைப்பவர்களைத் தலைமை மதிக்காததே மிகப்பெரிய பிரச்சனையாக உருவெடுத்துள்ளது என்று சாடியுள்ளார்.
விஜய்யின் அரசியல் நகர்வுகள் ஒருபுறம் தீவிரமடைந்து வரும் நிலையில், அவரது கட்சியின் முக்கிய நிர்வாகியே இப்படித் தொடர்ச்சியாகப் புகார்களை அடுக்குவது தவெக வட்டாரத்தில் பெரும் சலசலப்பை ஏற்படுத்தியுள்ளது. அமித் ஷா புகைப்படம் விவகாரம் மூலம் ரஞ்சனா ஒரு ‘ஸ்லீப்பர் செல்லாக’ச் செயல்படுகிறாரோ என்ற சந்தேகம் தொண்டர்களிடையே பரவி வந்த நிலையில், அதற்கு அவர் கொடுத்துள்ள இந்த விளக்கம் அரசியல் களத்தில் புதிய விவாதத்தைக் கிளப்பியுள்ளது. உழைப்பவர்களுக்கு அங்கீகாரம் கிடைக்காத வரை இதுபோன்ற அதிருப்திக் குரல்கள் ஓயாது என்பதே ரஞ்சனாவின் பேட்டியின் சாராம்சமாக உள்ளது.
