உத்தரப் பிரதேச மாநிலத்தில் பூட்டப்பட்டிருந்த ஒரு வீட்டிற்குள் இருந்து பெண்ணின் அழுகிய சடலம் கண்டெடுக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. இறந்துபோன பெண் ஷெஹ்னாஸ் பர்வீன் என அடையாளம் காணப்பட்டுள்ளார். இவர் தனது கணவர் அஹ்மத் ஹசன் மற்றும் குழந்தைகளுடன் வசித்து வந்த நிலையில், நிலம் தொடர்பான வேலைக்காகப் பூர்வீக ஊருக்கு வந்தபோது இச்சம்பவம் நடந்துள்ளது.

வேலை விஷயத்திற்காக வெளியூர் சென்றிருந்த மூத்த மகன் ஆசிஃப், தன் தாயுடன் கடைசியாகப் பேசிய பிறகு வீட்டிற்கு வந்து பார்த்தபோது கதவு பூட்டப்பட்டிருந்தது. தன்னிடம் இருந்த மாற்றுச் சாவியைக் கொண்டு கதவைத் திறந்து உள்ளே சென்ற அவனுக்குப் பேரதிர்ச்சி காத்திருந்தது. கட்டிலில் தாய் ஷெஹ்னாஸின் உடல் கடுமையாகச் சிதைந்து, துர்நாற்றத்துடன் சடலமாகக் கிடப்பதைக் கண்டு அவன் அதிர்ச்சியடைந்தான்.

உடனடியாகக் காவல் துறைக்குத் தகவல் அளித்த மகன் ஆசிஃப், தனது தந்தை அகமது ஹசன் மீது தாயைக் கொலை செய்ததாக நேரடிக் குற்றம் சாட்டினான். தனது தந்தை அதிக சந்தேகக் குணம் கொண்டவர் என்றும், சூதாட்டம் மற்றும் கெட்ட பழக்கங்களுக்கு அடிமையானவர் என்றும் அவன் தெரிவித்தான். மேலும், தனது சூதாட்டப் பணத்திற்காகப் பூர்வீக வீட்டையே விற்ற தந்தை, இதற்கு முன்பும் பலமுறை தாயைக் கொல்ல முயன்றுள்ளதாக அவன் கதறினான்.

தகவல் அறிந்து சம்பவ இடத்திற்கு விரைந்த காவல் துறையினர் மற்றும் தடயவியல் நிபுணர்கள், சடலத்தைக் கைப்பற்றிப் பிரேதப் பரிசோதனைக்காக அனுப்பி வைத்தனர். சடலம் பூச்சிகளால் பீடிக்கப்பட்டு மோசமான நிலையில் இருந்ததால், பிரேதப் பரிசோதனை அறிக்கை வந்த பிறகே மரணத்திற்கான சரியான காரணமும் நேரமும் தெரியவரும் என்று காவல் துறை தரப்பில் தெரிவிக்கப்பட்டுள்ளது.

கொலைக்குப் பிறகு கணவர் அகமது ஹசன் தனது கைபேசியை அணைத்துவிட்டுத் தப்பிச் சென்று தலைமறைவாகியுள்ளார். குடும்பத்தினர் அளித்த புகாரின் அடிப்படையில் வழக்குப்பதிவு செய்துள்ள காவல் துறையினர், தப்பியோடிய தந்தையைப் பிடிக்கத் தனிப்படைகள் அமைத்து தீவிரத் தேடுதல் வேட்டையில் ஈடுபட்டு வருகின்றனர்.