அதிமுக முன்னாள் அமைச்சரும், மூத்த தலைவர்களில் ஒருவருமான செங்கோட்டையன், தனது சட்டமன்ற உறுப்பினர் பதவியை ராஜினாமா செய்திருக்கும் விவகாரம் தமிழ்நாட்டின் அரசியல் களத்தை அதிர வைத்துள்ளது.

சபாநாயகர் அப்பாவுவை சந்தித்து செங்கோட்டையன் தனது ராஜினாமா கடிதத்தை அளித்தார். இந்த நிலையில், அவர் நாளை த.வெ.க. தலைவர் விஜய் முன்னிலையில் அக்கட்சியில் இணையவுள்ளதாக தகவல் வெளியாகி உள்ளது. இந்த திடீர் திருப்பம், அதிமுக தலைமைக்கு பெரும் பின்னடைவை ஏற்படுத்தியுள்ளதுடன், தமிழக அரசியல் சூழலில் புதிய விவாதங்களை எழுப்பியுள்ளது. ஒரு மூத்த தலைவர் திடீரென எம்.எல்.ஏ. பதவியை துறந்து வேறு ஒரு கட்சிக்கு தாவும் நிகழ்வு, எதிர்வரும் பொதுத்தேர்தலுக்கு முன்பு அரசியல் கட்சிகளின் வியூகங்களை மாற்றியமைக்கும் என எதிர்பார்க்கப்படுகிறது.

செங்கோட்டையனின் இந்த முக்கிய முடிவால், அரசியல் வட்டாரங்களில் ஒருவிதமான பரபரப்பு தொற்றிக் கொண்டுள்ளது. குறிப்பாக, அதிமுக பொதுச் செயலாளர் எடப்பாடி பழனிசாமி தலைமையிலான அதிமுக, நீண்ட நாட்களாக தவெகவுடன் கூட்டணி அமைக்கும் வாய்ப்பு குறித்து எதிர்பார்த்து காத்துக்கொண்டிருந்தது.

இருப்பினும், செங்கோட்டையன் போன்ற முக்கியஸ்தர் தனது பதவியை ராஜினாமா செய்து, த.வெ.க.வில் இணையவிருக்கும் நிலையில், அதிமுக – த.வெ.க. இடையேயான கூட்டணிக்கு இனி எவ்வித வாய்ப்பும் இல்லை என்பது உறுதியாகியுள்ளது.

இந்த நிகழ்வு, தமிழக அரசியல் களம் இனிமேல் அதிமுக, த.வெ.க., மற்றும் ஆளும் திமுகவை மையமாகக் கொண்டு மூவர் அணிகளாகப் பிரிந்து, பெரும் பரபரப்புக்கும் எதிர்பார்ப்புக்கும் உள்ளாகும் என அரசியல் நோக்கர்கள் கருத்துத் தெரிவிக்கின்றனர்.