டெக்சாஸ் மாநில அரசு நெட்ஃபிக்ஸ் நிறுவனத்திற்கு எதிராகத் தொடுத்துள்ள சமீபத்திய வழக்கு ஊடகத்துறையில் பெரும் பரபரப்பை ஏற்படுத்தியுள்ளது. நெட்ஃபிக்ஸ் நிறுவனம் தனது விளம்பரத் தரவு நடைமுறைகள் மூலம் பயனர்களின் அந்தரங்க உரிமைகளை மீறுவதாகவும், குறிப்பாக குழந்தைகளைக் கவரும் வகையில் அவர்களை அடிமையாக்கும் வடிவமைப்புகளை பயன்படுத்துவதாகவும் டெக்சாஸ் அரசு குற்றம் சாட்டியுள்ளது.
மேலும் பயனர்களின் தேடல் மற்றும் பார்க்கும் பழக்கவழக்கங்களை முறையற்ற வகையில் கண்காணித்து, அந்தத் தரவுகளை விளம்பரதாரர்களுக்குச் சாதகமாகப் பயன்படுத்துவதாக அந்த வழக்கு மனுவில் குறிப்பிடப்பட்டுள்ளது. மேலும், குழந்தைகளுக்கான உள்ளடக்கங்களை வழங்கும் போது, அவர்கள் நீண்ட நேரம் திரையிலேயே இருக்கும்படி தூண்டும் வகையிலான தொழில்நுட்ப உத்திகளை நெட்ஃபிக்ஸ் கையாளுவதாகத் தெரிவிக்கப்பட்டுள்ளது.
இது குழந்தைகளின் மனநலம் மற்றும் பாதுகாப்பிற்கு அச்சுறுத்தலாக அமையக்கூடும் என டெக்சாஸ் சட்டமா அதிபர் கவலை தெரிவித்துள்ளார். இந்த சட்டப் போராட்டம், டிஜிட்டல் தளங்களில் பயனர் கண்காணிப்பு மற்றும் தரவுப் பாதுகாப்பு குறித்த விவாதங்களை மீண்டும் முன்னெடுத்துள்ளது. நெட்ஃபிக்ஸ் போன்ற பெரிய நிறுவனங்கள் தங்களின் லாபத்திற்காகப் பயனர்களின் அந்தரங்கத்தை விலைபேசக்கூடாது என்பதே இந்த வழக்கின் முக்கிய நோக்கமாகும்.
