பொதுப் போக்குவரத்தில் பயணம் செய்யும்போது, சக பயணிகள் சிலர் இயர்போன்  இல்லாமல் சத்தமாக பாட்டு கேட்பது, வீடியோ பார்ப்பது அல்லது செல்போனில் அலறுவது போன்ற செயல்கள் நமக்கு பெரும் எரிச்சலை ஏற்படுத்துவது வழக்கமான ஒன்றுதான். ஆனால், இனி சென்னை மெட்ரோ ரயில்களில் இப்படிப்பட்ட தொல்லைகள் இருக்காது. பயணிகளின் அமைதியான பயணத்தை உறுதி செய்யும் வகையில், மெட்ரோ ரயிலிலோ அல்லது ரயில் நிலையங்களிலோ சத்தமாக பாட்டு கேட்பவர்கள் மற்றும் கூச்சலிட்டு பிறருக்கு இடையூறு செய்பவர்களுக்கு 2,500 ரூபாய் வரை அபராதம் விதிக்கப்படும் என சென்னை மெட்ரோ நிர்வாகம் அதிரடியாக அறிவித்துள்ளது. கடந்த ஜூன் 19, 2026 அன்று மத்திய அரசு வெளியிட்ட  அறிவிப்பாணையின்படி, மெட்ரோ ரயில்வே சட்டத்தில் திருத்தம் கொண்டுவரப்பட்டு, முன்னதாக இருந்த 500 ரூபாய் அபராதத் தொகை தற்போது 2,500 ரூபாயாக உயர்த்தப்பட்டுள்ளது.

சென்னை மெட்ரோ நிர்வாகத்தின் இந்த அதிரடி அறிவிப்புக்கு இணையத்தில் பொதுமக்கள் மத்தியில் மிகப்பெரிய வரவேற்பு கிடைத்துள்ளது. “இதை இந்தியா முழுவதும் உள்ள அனைத்து பொது இடங்களிலும், குறிப்பாக நடைப்பயிற்சி செய்யும் பூங்காக்களிலும் கட்டாயம் அமல்படுத்த வேண்டும்” என நெட்டிசன்கள் பலரும் தங்களது ஆதரவை தெரிவித்து வருகின்றனர். அதேவேளையில், “அபராதத் தொகையை உயர்த்துவது மட்டும் போதாது; அதனை நடைமுறையில் கடுமையாகக் கண்காணிக்க வேண்டும். ரயில்களில் ரோந்து செல்ல ஆட்களை நியமித்து, விதிகளை மீறுபவர்கள் மீது தயவுதாட்சண்யமின்றி உடனுக்குடன் அபராதம் விதித்தால் மட்டுமே இந்த திட்டம் முழுமையான வெற்றியை அடையும்” எனவும் இணையவாசிகளால் மிகத் தெளிவாக வலியுறுத்தப்பட்டு வருகிறது.