“பாரிஸின் காட்டேரி” என்று அறியப்படும் நிகோ க்ளாக்ஸ் என்ற நபர், தான் செய்த நரமாமிசம் மற்றும் கொலை போன்ற கொடூரமான குற்றங்களைப் பற்றி, சமீபத்திய “Anything Goes” என்ற போட்காஸ்ட் நிகழ்ச்சியில் வெளியிட்டுள்ள அதிர்ச்சித் தகவல்கள் கேட்போரை திடுக்கிட வைத்துள்ளன. பிணவறையில் பணிபுரிந்தபோதுதான் முதன்முதலாக மனித மாமிசத்தை சுவைத்ததாக நிகோ விவரித்துள்ளார்.

அந்த ஒரு கணத்தில் அவருக்குள் ஒரு பயங்கரமான அடிமைத்தனம் பிறந்ததாகவும், அதன்பிறகு உலகில் உள்ள மற்ற எல்லா உணர்வுகளும் அர்த்தமற்றதாகவும் மந்தமாகவும் தோன்றியதாகவும் அவர் கூறியுள்ளார். இந்த பைத்தியக்காரத்தனமான ஆவேசம் அவருக்குச் சிறுவயதிலேயே தொடங்கிவிட்டது. 10 வயதில் அவரது தாத்தா இறந்த பிறகு, அவர் மரணத்தின் மீது ஒரு விசித்திரமான ஈர்ப்புக்கு ஆளானார்.

அந்தப் போட்காஸ்ட்டில் அவர் மேலும் விவரிக்கையில், அந்தக் காலகட்டத்தில் பிரான்சில் உள்ள பிணவறைகளில் பணிபுரிய கடுமையான விதிகள் எதுவும் இல்லை என்றும், பிரேதப் பரிசோதனையின்போது தனியாக இருக்கும்போது இறந்த உடல்களில் இருந்து சதை துண்டுகளை வெட்டி சாப்பிட்டதாகவும் தெரிவித்துள்ளார். ஆரம்பத்தில் பச்சையாகச் சாப்பிட்ட அவர், பின்னர் சிறிய துண்டுகளை வீட்டிற்குக் கொண்டு சென்று சமைத்து சாப்பிட்டுள்ளார்.

ஆனால், திருடப்பட்ட இந்த மாமிசத்தினால் அவரது பசி அடங்கவில்லை. இறுதியாக, ஆன்லைனில் சந்தித்த தியரி பிசோனியர் என்ற ஒருவரைக் கொலை செய்தார். கைது செய்யப்பட்ட பிறகு, மாமிசத்திற்காக மட்டுமே கொலை செய்ததாக அவர் ஒப்புக்கொண்டார். நீதிமன்றம் அவருக்கு 12 ஆண்டுகள் சிறைத் தண்டனை விதித்தது, அதில் அவர் ஏழு ஆண்டுகள் மற்றும் நான்கு மாதங்கள் சிறையில் கழித்தார்.

மனித மாமிசம் குதிரை மாமிசம் போலச் சுவைப்பதாகவும், ஆனால் சுவை உண்மையான காரணம் அல்ல என்றும், மாறாக அவர் தேடியது ஒரு ஆபத்தான சிலிர்ப்பும், போதையும் என்றும், இந்த உச்சகட்ட உணர்வுதான் அவரைக் கொலை செய்யத் தூண்டியது என்றும் நிகோ க்ளாக்ஸ் கூறியுள்ளார்.