சென்னை மாநகராட்சியில் ராயபுரம் மற்றும் திரு.வி.க. நகர் மண்டலங்களில் தூய்மைப் பணியைத் தனியாருக்குத் தாரை வார்த்ததைக் கண்டித்து, தொழிலாளர்கள் நீண்ட நாட்களாகப் போராடி வருகின்றனர். இதில் ராயபுரம் 50-வது வட்டத்தில் பணியாற்றிய டி. ரவிக்குமார் என்ற தூய்மைப் பணியாளர், கடந்த 5 மாதங்களாக வேலையும் இன்றி, ஊதியமும் இன்றி கடும் வறுமையில் வாடி வந்துள்ளார்.

இதனால் ஏற்பட்ட மன உளைச்சலில் அவர் தூக்கிட்டு தற்கொலை செய்து கொண்ட சம்பவம் தமிழகம் முழுவதும் பெரும் அதிர்ச்சியை ஏற்படுத்தியுள்ளது. ஆளும் அரசின் இந்த அலட்சியப் போக்கால் ஓர் அப்பாவி உயிர் பறிபோயிருப்பதாக எதிர்க்கட்சிகள் கடும் கண்டனம் தெரிவித்து வருகின்றன.

இந்தத் துயரச் சம்பவத்திற்குத் தமிழக பாஜக தலைவர் நயினார் நாகேந்திரன் கடும் கண்டனம் தெரிவித்து அறிக்கை வெளியிட்டுள்ளார். அதில், “தமிழகத்தையும் மக்களையும் அழிவின் விளிம்பிற்குத் தள்ளும் அறிவாலயம் எனும் நஞ்சுக்கொடியை இனியும் தமிழகத்தில் படர விடக்கூடாது” என்று ஆவேசமாகச் சாடியுள்ளார்.

நியாயமான கோரிக்கைகளுக்காகப் போராடுபவர்கள் மீது அடக்குமுறையை ஏவி, சாமானியர்களைத் தற்கொலைக்குத் தூண்டும் இந்த மக்கள் விரோத அரசுக்கு எதிராக அவர் தனது கண்டனத்தைப் பதிவு செய்துள்ளார். மேலும், உயிரிழந்த ரவிக்குமாரின் குடும்பத்திற்குத் தனது ஆழ்ந்த இரங்கலையும் அவர் தெரிவித்துக் கொண்டுள்ளார்.