சென்னை அயனாவரத்தில் செய்தியாளர்களைச் சந்தித்த அமைச்சர் சேகர்பாபு தமிழக வெற்றிக் கழகத்தின் நிர்வாகி ஆதவ் அர்ஜுனா வில்லிவாக்கம் தொகுதியில் போட்டியிடப் போவதாக வெளியான தகவல்கள் குறித்துத் தனது காட்டமான கருத்துகளைப் பதிவு செய்தார். நயவஞ்சகத்தோடு சுற்றித் திரியும் கூட்டத்திற்கு வில்லிவாக்கத்தில் மக்கள் சார்பாகத் தக்க பதிலடி கொடுக்கப்படும் என்று அவர் உறுதியாகத் தெரிவித்தார்.
எதை வேண்டுமானாலும் பேசலாம் என்ற நோக்கத்தோடு செயல்படுபவர்களுக்கு வரவிருக்கும் தேர்தலில் உரிய பாடம் புகட்டப்படும் என்றும் அவர் எச்சரிக்கை விடுத்தார். அரசியல் களத்தில் எதிர்த்தரப்பில் இருந்து வீசப்படும் ஒவ்வொரு வார்த்தை அம்புகளுக்கும் அதே பாணியில் பதிலடி கொடுக்கத் திமுக தயாராக இருப்பதாகவும் அவர் கூறினார்.
பணம் இருக்கிறது என்பதற்காக எதை வேண்டுமானாலும் பேசலாம் என்று நினைப்பவர்கள் மக்கள் சக்தியைப் புரிந்து கொள்ள வேண்டும் என்று அமைச்சர் சேகர்பாபு குறிப்பிட்டார். பால்வாடி நிலையில் இருக்கும் புதிய இயக்கங்களுக்குப் பவள விழா காணும் திராவிட முன்னேற்றக் கழகம் போன்ற அனுபவம் வாய்ந்த இயக்கங்கள் நிச்சயம் தகுந்த முறையில் பதில் சொல்லும் என்று அவர் சுட்டிக்காட்டினார்.
அரசியல் முதிர்ச்சி இல்லாத பேச்சுகளுக்குத் தேர்தல் முடிவுகள் சாட்சியாக அமையும் என்றும் அவர் தெரிவித்தார். அமைச்சரின் இந்த அதிரடிப் பேச்சு அரசியல் வட்டாரத்தில் பெரும் பரபரப்பை ஏற்படுத்தியுள்ளதுடன் வில்லிவாக்கம் தொகுதியில் தேர்தல் களம் இப்போதே சூடுபிடிக்கத் தொடங்கியுள்ளது.
