காலையில் வேலைக்குச் செல்பவர்கள் பலரும் அவசரம் அவசரமாகச் சாப்பிடும் பழக்கத்தைக் கொண்டிருக்கிறார்கள். ஓரிரு நிமிடங்களிலேயே நான்கைந்து இட்லிகளை மெல்லாமல் விழுங்குபவர்களும் உண்டு. ஆனால், இப்படி வேகமாகச் சாப்பிடுவது வயிற்றுக்கு ஆரோக்கியமானதல்ல. வேகமாகச் சாப்பிடும் போது உணவைச் செரிமானம் செய்வதற்கு உடலுக்குப் போதுமான நேரம் கிடைப்பதில்லை. இதனால் வயிறு கூடுதல் நேரம் வேலை செய்ய வேண்டிய கட்டாயம் ஏற்படுகிறது.

அவசரமாகச் சாப்பிடுவதன் வெளிப்பாடாக வயிறு உப்புசம், அஜீரணம், அசிடிட்டி போன்ற பல பிரச்சனைகள் உண்டாகின்றன. மேலும், உணவைச் சரியாக மென்று சாப்பிடாத போது, அதிலிருந்து உடலுக்குக் கிடைக்க வேண்டிய முழுமையான ஆற்றலும் சத்துக்களும் கிடைப்பதில்லை. இந்த ஆரோக்கியக் கேட்டைத் தவிர்க்கச் சில எளிய பழக்க வழக்கங்களை தினசரி வாழ்க்கையில் பின்பற்றினாலே போதுமானது.

சாப்பிடுவதற்கு முன்பு அவசரப்படாமல் நிதானமாக அமர்ந்து உடலையும் மனதையும் ஆசுவாசப்படுத்திக் கொள்ள வேண்டும். கை நிறைய உணவை அள்ளி வாயில் வைப்பதற்குப் பதிலாக, சிறிய அளவிலான உணவை எடுத்து நன்றாக மென்று சாப்பிட வேண்டும். வாயில் இருக்கும் உணவை முழுமையாக மென்று விழுங்கும் வரை அடுத்த வேளை உணவைக் கையில் எடுக்காமல் கைக்கு ஓய்வு கொடுக்க வேண்டும்.

நாம் சாப்பிடும் உணவால் வயிறு நிறைந்துவிட்டது என்ற தகவலை மூளைக்குக் கொண்டு சேர்க்க உடலுக்குச் சிறிது நேரம் தேவைப்படுகிறது. எனவே, அவசரமாகச் சாப்பிடுவதையும், உணவை மெல்லும் போது பேசுவதையும் முற்றிலும் தவிர்க்க வேண்டும். அதேபோல, சாப்பிடும் நேரத்தில் கைபேசி  பார்ப்பதை நிறுத்துவது செரிமானத்திற்கு மிகவும் நல்லது.

நமது உடல் என்பது ஒரு இயந்திரம் அல்ல; அதை மிகக் கவனமாகக் கையாள வேண்டும். எனவே உணவை ரசித்து, மெதுவாக மென்று சாப்பிடுவதன் மூலம் செரிமானப் பிரச்சனைகளில் இருந்து விடுபட்டு, உடலை எப்போதும் ஆரோக்கியமாக வைத்திருக்க முடியும்.