மத்தியப் பிரதேச மாநிலம் இன்டோர் நகரில் அமைந்துள்ள கஜ்ரானா காவல் நிலைய எல்லைக்குட்பட்ட பகுதியில், ஐசிஐசிஐ வங்கியில் பணியாற்றி வந்த இளம் பெண் ஒருவர் வாடகை வீட்டில் மர்மமான முறையில் தீயில் கருகி உயிரிழந்துகிடந்த சம்பவம் அப்பகுதியில் பெரும் பரபரப்பை ஏற்படுத்தியுள்ளது.
‘பலக்’ என்ற அந்தப் பெண், தபஸ்வரி பாக் பகுதியில் உள்ள ஒரு வீட்டை வாடகைக்கு எடுத்து கடந்த நான்கு ஆண்டுகளாகத் தனியாகத் தங்கித் தனது பணியைத் தொடர்ந்து வந்துள்ளார்.
இந்த நிலையில் அவர் தனது அறையில் சடலமாகக் கிடப்பதாகக் கிடைக்கப்பெற்ற தகவலை அடுத்துக் காவல்துறையினர் உடனடியாகத் சம்பவ இடத்திற்கு விரைந்து சென்றனர்.
காவல்துறையினர் வீட்டின் கதவை உற்றுத் திறந்து பார்த்தபோது, உடல் முழுவதும் தீயில் கருகிய கோலத்தில் அந்தப் பெண் இறந்துகிடப்பது கண்டறியப்பட்டது. இதனையடுத்து அந்தப் பகுதியைச் சுற்றிலும் பாதுகாப்பைப் பலப்படுத்திய அதிகாரிகள், தடயவியல் நிபுணர்களை வரவழைத்து அறையில் உள்ள கைரேகைகள் மற்றும் முக்கிய அறிவியல் சான்றுகளைத் தீவிரமாகச் சேகரித்தனர்.
வீட்டின் சமையலறைப் பகுதியில் சில சிறிய சமையல் பொருட்கள் இருந்ததையும் அதிகாரிகள் நேரில் பார்வையிட்டுப் பதிவு செய்துள்ளனர்.
இந்த மரணம் விபத்தா, தற்கொலையா அல்லது திட்டமிட்ட கொலையா என்பது குறித்து இன்னும் எந்தத் தெளிவான முடிக்கும் வர இயலவில்லை என்று அதிகாரிகள் தரப்பில் தெரிவிக்கப்பட்டுள்ளது
உடலைக் கைப்பற்றிப் பிரேத பரிசோதனைக்காக மருத்துவமனைக்கு அனுப்பி வைத்துள்ள காவல்துறை, மருத்துவ அறிக்கை மற்றும் தடயவியல் ஆய்வின் முடிவுகள் வந்த பிறகே உண்மையான காரணம் தெரியவரும் என்று கூறியுள்ளனர்.
மேலும், சம்பவம் நடைபெற்ற அந்தச் சமயத்தில் அந்தப் பெண்ணுடன் வேறு யாரேனும் அங்கு வந்திருந்தனரா என்பதை உறுதிப்படுத்தும் வகையில் அக்கம் பக்கத்திலுள்ள சிசிடிவி கேமரா பதிவுகளை ஆய்வு செய்வதுடன், அண்டை வீட்டாரிடமும் தீவிரமாக விசாரணை நடத்தி வருகின்றனர்.
உயிரிழந்த பெண்ணின் குடும்பத்தினருக்குத் தகவல் தெரிவிக்கப்பட்டுள்ள நிலையில், அவர்கள் இன்டோர் வந்தடைந்ததும் அவர்களின் முறையான வாக்குமூலங்கள் பதிவு செய்யப்படும் என்றும், செல்போன் அழைப்பு விவரங்களும் முழுமையாக ஆராயப்படும் என்றும் காவல் துறையினர் தெரிவித்துள்ளனர்.
