இந்திய கிரிக்கெட் உலகின் புதிய நம்பிக்கை நட்சத்திரமாக அசுர வளர்ச்சி கண்டுவரும் 15 வயது இளம் வீரர் வைபவ் சூர்யவன்ஷி குறித்து, சீனியர் வீரர் இஷான் கிஷன் வெளியிட்டுள்ள முக்கியத் தகவல்கள் தற்போது கிரிக்கெட் வட்டாரத்தில் வைரலாகி வருகிறது. ஜிம்பாப்பே அணிக்கு எதிரான முதல் டி20 போட்டியில் வெறும் 18 பந்துகளில் அரைசதம் அடித்து உலக சாதனை படைத்த வைபவ், அதனைத் தொடர்ந்து நடைபெற்ற இரண்டாவது போட்டியில் 9 பந்துகளில் 20 ரன்கள் எடுத்து ஆட்டமிழந்தார்.

இந்தப் போட்டியில் அதிரடியாக விளையாடி 81 ரன்கள் குவித்து இந்திய அணியின் வெற்றிக்கு முக்கியக் காரணமாகத் திகழ்ந்த இஷான் கிஷன், பத்திரிகையாளர் சந்திப்பின் போது வைபவ் சூர்யவன்ஷியைப் பாதுகாப்பதற்காக இந்திய அணி வைத்துள்ள தெளிவான திட்டங்களைப் பகிர்ந்துகொண்டார். வைபவ் மிகவும் புத்திசாலித்தனமான ஒரு வீரர் என்று வர்ணித்த இஷான் கிஷன், அவரது மிகக் குறைந்த வயதைக் கருத்தில் கொண்டு அவரைச் சமூக வலைதளங்கள் மற்றும் தேவையற்ற வெளிப்புறச் சத்தங்களிலிருந்து  முற்றிலுமாகத் தள்ளி வைக்க ஒட்டுமொத்த அணியும் தீவிர முயற்சி மேற்கொண்டு வருவதாகத் தெரிவித்தார்.

இன்றைய டிஜிட்டல் உலகில் சமூக வலைதளங்கள் மிக எளிதாக ஒரு இளம் வீரரின் கவனத்தைச் சிதறடித்துவிடும் என்பதில் அணி நிர்வாகம் உறுதியாக உள்ளது. எனவே, வைபவ் தனது பேட்டிங்கிலும் கிரிக்கெட்டிலும் மட்டுமே முழுமையாகக் கவனம் செலுத்த வேண்டும் என்பதற்காக, அணியில் உள்ள சீனியர் வீரர்கள் அவரிடம் கிரிக்கெட் தொடர்பான விஷயங்களைத் தவிர வேறு எதையும் பேசுவதில்லை என்று அவர் குறிப்பிட்டுள்ளார். மேலும், இஷான் கிஷன் ஒரு மூத்த சகோதரனின் ஸ்தானத்தில் நின்று வைபவ்விற்குத் தொடர்ந்து பல ஆலோசனைகளை வழங்கி வருகிறார். தானும் வைபவ் சூர்யவன்ஷியும் ஒரே மாதிரியான பின்னணியில் இருந்து வந்தவர்கள் என்பதால், தான் கிரிக்கெட்டின் ஆரம்ப காலத்தில் செய்த எந்தத் தவறும் இந்தச் சிறுவன் செய்துவிடக் கூடாது என்பதில் அவர் மிகுந்த கவனமுடன் இருக்கிறார்.

“நாங்கள் அவரிடம் ஒரு சகோதரரைப் போலப் பழகுகிறோம். அக்ஷர் பட்டேல், அபிஷேக் சர்மா என அணியில் உள்ள அனைவரும் வைபவ்-ஐ எப்போதும் மகிழ்ச்சியாகவும் ரிலாக்ஸாகவும் வைத்திருக்கிறோம். ஒருவேளை அவர் ரன்கள் எடுக்காத சமயங்களில் சோர்ந்து போய்விடக் கூடாது என்பதற்காக அவரது உடல் மொழியை நாங்கள் தொடர்ந்து கவனித்து வருகிறோம்” என்று இஷான் கிஷன் மிகவும் நெகிழ்ச்சியுடன் தெரிவித்தார்.

பவர்பிளே ஓவர்களில் முதல் பந்திலிருந்தே எதிரணிப் பந்துவீச்சாளர்களைக் கதி கலங்கடிக்கும் வைபவ் போன்ற ஒரு அபூர்வத் திறமை கொண்ட வீரர் இந்திய அணிக்குக் கிடைத்துள்ள மிகப்பெரிய பொக்கிஷமாவார். அத்தகையதொரு அசாத்தியத் திறமை கொண்ட வீரர் தவறான காரணங்களால் திசைமாறிப் போய்விடக் கூடாது என்பதில் இந்திய அணி நிர்வாகம் மிகவும் தெளிவாகச் செயல்பட்டு வருகிறது. கிரிக்கெட்டில் மட்டும் தனது முழு கவனத்தைச் செலுத்தி, மன ரீதியாகவும் உடல் ரீதியாகவும் தன்னைத் தொடர்ந்து மேம்படுத்திக் கொண்டால், வைபவ் சூர்யவன்ஷி எதிர்காலத்தில் இந்திய கிரிக்கெட்டின் அடுத்த மிகப்பெரிய சூப்பர் ஸ்டாராக மாறுவார் என்பதில் எந்தச் சந்தேகமும் இல்லை என்று இஷான் கிஷன் தனது பேட்டியில் திட்டவட்டமாகத் தெரிவித்தார்.