திமுக இளைஞரணி கூட்டத்தில் காங்கிரஸ் கட்சியை ‘முதுகில் குத்தியவர்கள்’ என்று விமர்சித்து தீர்மானம் நிறைவேற்றியதற்கு தமிழ்நாடு காங்கிரஸ் கமிட்டி கடும் கண்டனம் தெரிவித்துள்ளது. பல ஆண்டுகளாக மதச்சார்பற்ற கூட்டணியில் முக்கிய அங்கமாக இருக்கும் காங்கிரஸை அவமதிக்கும் வகையில் திமுக செயல்பட்டுள்ளதாக காங்கிரஸ் தனது அறிக்கையில் சாடியுள்ளது.
தேர்தல் காலங்களில் கூட்டணிக் கட்சிகளின் உழைப்பையும் வாக்குகளையும் முழுமையாகப் பயன்படுத்திக் கொண்டு, பின்னர் அரசியல் ஆதாயத்திற்காக அவர்களையே குறிவைத்து தாக்குவது திமுகவின் இரட்டை வேட அரசியலை வெளிப்படுத்துகிறது என்றும் காங்கிரஸ் குற்றம் சாட்டியுள்ளது.
மேலும், கூட்டணிக் கட்சிகளின் ஆதரவும் வாக்கு வலிமையும் இல்லாமல் திமுக தமிழகத்தில் தனித்து நின்று என்றுமே வெற்றி பெற்றதில்லை என்பதைப் பொதுமக்கள் நன்கு அறிவார்கள் என்றும் காங்கிரஸ் சுட்டிக்காட்டியுள்ளது.
தங்களது அரசியல் தோல்விகளையும் மக்கள் மத்தியிலுள்ள எதிர்ப்பையும் மறைப்பதற்காகவே காங்கிரஸ் மீது பழி போடும் வகையில் திமுக தீர்மானங்களை நிறைவேற்றி வருவதாக அந்த அறிக்கையில் கூறப்பட்டுள்ளது.
அரசியலில் நன்றி உணர்வும் கூட்டணி தர்மமும் முக்கியம் என்பதை நினைவூட்டியுள்ள காங்கிரஸ், தங்களோடு சேர்த்து விடுதலை சிறுத்தைகள் கட்சி, கம்யூனிஸ்ட் கட்சிகள் மற்றும் முஸ்லிம் லீக் போன்ற இதர கூட்டணிக் கட்சிகளின் பங்களிப்பையும் திமுக ஒருபோதும் மறக்கக் கூடாது என்று வலியுறுத்தியுள்ளது.
