இந்தியாவில் மருத்துவப் படிப்புகளுக்கான நீட் (NEET) நுழைவுத் தேர்வு அறிமுகப்படுத்தப்பட்ட நாளில் இருந்தே பல்வேறு எதிர்ப்புகள் தொடர்கின்றன. குறிப்பாகத் தமிழ்நாட்டில் கிராமப்புற மாணவர்களின் மருத்துவக் கனவை இத்தேர்வு சிதைப்பதாகக் கூறி, அரசு மற்றும் பல அமைப்புகள் தொடர்ந்து போராடி வருகின்றன.

​மற்றொரு புறம், டெல்லி ஜந்தர் மந்தரில் வினாத்தாள் கசிவு மற்றும் முறைகேடுகளைக் கண்டித்து மாணவர்கள் தீவிரப் போராட்டத்தில் ஈடுபட்டு வருகின்றனர். அவர்கள் மீது நடத்தப்பட்ட தடியடி சம்பவத்தைத் தொடர்ந்து, பல அரசியல் தலைவர்களும் திரைப்பலங்களும் மாணவர்களுக்கு ஆதரவாகக் குரல் கொடுத்து வருகின்றனர்.

​இப்படி நாடு முழுவதும் நீட் தேர்வுக்கு எதிராகப் போராட்டங்கள் தீவிரமடைந்து வரும் சூழலில், நடிகர் சரத்குமார் நீட் தேர்வுக்கு ஆதரவாகப் பேசியிருப்பது மிகப்பெரிய புயலைக் கிளப்பியுள்ளது. மாணவர்களுக்கு நீட் நுழைவுத் தேர்வு மிகவும் அவசியம் என அவர் திட்டவட்டமாகத் தெரிவித்துள்ளார்.

​காவல்துறையில் சேர எழுத்துத் தேர்வும் உடற்தகுதித் தேர்வும் வைக்கப்படுவது போலவே, சிறந்த மருத்துவர்களாக உருவெடுக்க நீட் போன்ற தேர்வும் அவசியமானது என்று அவர் வாதிட்டுள்ளார். தகுதியான நபர்களைத் தேர்ந்தெடுக்க இதுபோன்ற தேர்வுகள் நிச்சயம் தேவை என்பது அவரது கருத்தாக உள்ளது.

​மேலும் வினாத்தாள் கசிவு குறித்துப் பேசிய அவர், இது முன்பும் பல தேர்வுகளில் நடந்துள்ள ஒன்றுதானே தவிர புதிய விஷயம் கிடையாது என்றார். இதனால் நீட் தேர்வே இருக்கக் கூடாது என்று சொல்வது நியாயம் இல்லை என அவர் கூறியது சோசியல் மீடியாவில் கடும் அதிர்வலைகளை ஏற்படுத்தியுள்ளது.